Greva e urisë dhe pazaret e pretenduara jashtë minierës

Një prej përfaqësuesve të sindikatës së minatorëve, Tafë Koleci, pretendon se tri ditë më parë i ka mbërritur një sms, që thotë: “Përshëndetje zoti Koleci! Jam Fatos Kaleshi, juristi i ACR-së, dhe po të shkruaj në emër të Gigës [Giga Bedineishvilli është administratori i kompanisë. Shënim i redakisë]. Mund të takohemi në aeroportin Nënë Tereza sot në orën 13.00? Do jemi vetëm ne të tre. Dëshirojmë të vish vetëm. Të lutem, na e konfirmo!”

Asnjë prej gazetarëve që kanë shkruar lidhur me këtë sms nuk na bën me dije, nëse kanë zhbiriluar në inbox-in e celularit të Kolecit për ta konfirmuar këtë pretendim, apo thjesht besojnë atë që u është thënë. Në fakt, është një sms i çuditshëm (“hajde vetëm”, “do jemi të tre”). Nuk është se mund të shërbejë si provë për t’u përdorur nga organet e drejtësisë në kurriz të dërguesit, por ne gazetarët në këtë rast s’e kemi për gjë ta kualifikojmë si “një sms që bie erë” (nëse do të ish një sms i vërtetë). Ashtu siç bie erë dhe takimi në Rinas, i kërkuar me sms-në në fjalë, ku është folur, gjithmonë sipas Kolecit, për të mbyllur grevën e urisë në këmbim të parave. Duhet besuar Koleci? Një gjë është e sigurtë në këtë mes: Ose sindikalisti duhet ndjekur penalisht për shpifje (i paditur nga ACR-ja), ose përfaqësuesit e ACR-së duhen ndjekur penalisht për veprën e korrupsionit aktiv (të paditur nga Tafë Koleci).

E.G.