E diel. Tirana është e shkretë. Të gjithë drejt detit.

Kjo është e diela më e shkretë e Tiranës gjatë kësaj vere. Me sa duket, një pjesë e madhe e banorëve të metropolit e kanë mbledhur mendjen për ta kaluar të dielën buzë detit. Shumë syresh nuk kanë mundësi të bëjnë pushime të gjata, të cilat janë të kushtueshme (agjencitë e lajmeve thoshin se edhe në Itali nuk është verifikuar fluksi i zakonshëm i pushuesve të muajit gusht), por një ditë e javës, sidomos kur moti është si një ftesë për t’u nisur drejt Adriatikut, nuk është ndonjë barrë e madhe në buxhetin e familjeve.

Prandaj gjatë paradites së sotme, në rrugët e Tiranës, syri të shihte veç të moshuar, tregtarë në nevojë që kërkonin të shtrydhnin në mënyrën e tyre dhe ditët e përtacisë humane, pensionistë me ndonjë gazetë në duar, njerëz që shëtisnin me qenin afër shtëpive, dhe aty-këtu të rinj e të reja të veshur shumë lehtë e si të trallisur. Vendet e parkimit buzë rrugëve kryesore ishin bosh, si kurrë ndonjëherë. Qetësinë e prishnin herë pas here varganët e makinave me dasmorë. Kujt i është dashur të jetë e të dalë në Tiranë në orët e para të së dielës së sotme, me siguri mund t’i jetë dukur për ndonjë moment se nuk është në Tiranë.

E.G.