Tension në Irak, 68 viktima nga sulmet vetëvrasëse

Të paktën 68 persona njoftohen se janë vrarë në sulmet me bomba që ndodhën në jug të Irakut si dhe në kryqyetetin e vendit, Bagdad. Zyrtarët e qeverisë irakene thanë se 44 prej viktimave humbën jetën gjatë një sulmi vetëvrasës që kishte në shënjestër pelegrinët shiitë në qytetin e Nasirijas. 

Më herët, të paktën 24 persona u vranë në një numbër shpërthimesh në zona të populluara me shiitë në Bagdad. Tensionet sektare në Irak janë rritur së tepërmi që kur trupat e fundit luftarake amerikane lanë vendin në dhjetor. Menjëherë pas kësaj, qeveria lëshoi një urdhër arresti për zëvendëspresidentin suni, Tariq al-Hashemi. 

Të gjitha këto, sipas analistëve, tregojnë se Iraku po kalon një krizë të rëndë politike dhe situata në vend është vërtet e tensionuar. Ndërkaq, detajet e publikuara nga autoritetet tregojnë sulme të koordinuara që kanë pasur në shënjestër civilët dhe përhapjen e panikut. Pelegrinët janë sulmuar ndërsa ecnin drejt qytetit të shenjtë të Qerbalasë, kur një kamikaz ka shpërthyer një rrip me eksplozivë, mbi 70 persona u plagosën. 

Në Bagdad, sulmet kishin në fokus civilët në Sadr City dhe Kadhimija, duke lënë edhe 66 të plagosur. Dy shpërthime në Sadr City, dhe më pas një i tretë rreth 30 minuta më pas. Zëdhënësi i ushtrisë irakene, Qassim al-Moussawi tha se qëllimi i sulmeve ishte të krijojë ndarje mes popullit të Irakut. Ai tha se ende nuk mund të konfirmohet se kush qëndron pas këtyre sulmeve.

Juli Prifti

Albanian Screen