Rama: Kroacia, model frymëzimi. Milanoviç: Mbështetje të plotë për integrimin në BE

Kryeministri kroat Zoran Milanoviç ndodhet në Tiranë ku po zhvillon një vizitë zyrtare dy ditore.

Ai është pritur me një ceremoni shtetërore të organizuar në hyrje të Kryeministrisë nga kreu i qeverisë, Edi Rama, ndërkohë që në fund të këtij takimi u mbajt edhe  një konferencë e përbashkët për shtyp .

Në fjalën e tij, kryeministri Edi Rama u shpreh se Kroacia është një histori suksesi dhe model frymëzimi jo vetëm për Shqipërinë, por për të gjithë rajonin. Sipas Ramës, rruga e Kroacisë është një frymëzim edhe për një vend aspirant siç është Shqipëria në rrugën drejt BE.

Ai i vlerësoi si shumë të mira marrëdhëniet mes dy vendeve tona të cilat pritet të marrin një hov të ri bashkëpunimi në të ardhmen.

Nga ana e tij kryeministri kroat, vlerësoi Shqipërinë dhe shqiptarët, popull që sipas tij kroatët i njohin nga minoriteti shqiptar që jeton në Kroaci dhe që vijnë nga Kosova dhe Maqedonia. Ai i shprehu homologut të tij shqiptar mbështetjen e plotë për marrjen e statusit të vendit kandidat të BE, duke shtuar se populli dhe qeveria kroate e dinë shumë mirë se sa e vështirë dhe e gjatë është kjo rrugë.

Milanoviç e garantoi kryeministrin Rama se Kroacia do të jetë e vendosur të mos lejojë asnjë prapaskenë gjatë bisedimeve të vendeve të BE për marrjen e statusit në qershor nga Shqipëria duke shprehur gjithashtu besimin se marrja e statusit nga Shqiperia ne muajin qershor eshte plotesisht e arritshme.

“Ne si vend anëtar i BE-së do të jemi kundër çdo zëri kundër nga qarqe të caktuara në BE. Është i mundshëm afati i qershorit për marrjen e statusit kandidat të Shqipërisë”, tha Milanoviç.

Më vonë gjatë ditës, Kryeministri kroat pritet të zhvillojë takime edhe me Presidentin Bujar Nishani, Kryetarin e Kuvendit Ilir Meta dhe me kreun e opozitës, Lulzim Basha.

20 janar 2014 (gazeta-Shqip.com)