Nuk sigurojnë jetën. Shqiptarët tregojnë pak interes

Sigurimi i jetës nga qytetarët shqiptarë është në një nivele shumë të ulëta. Më pak se 2 për qind e tregut të sigurimeve në Shqipëri e zë sigurimi i jetës, ç'ka tregon se interesi i shqiptarëve për të siguruar jetën e tyre është krejt i vogël, në raport me sigurimin e automjeteve. Shqiptarët paguajnë sigurime vetëm për rastet e detyreshme, për makinën, për banesën kur marrin kredi dhe kur udhëtojnë jashtë vendit. 

Avni Ponari, Drejtori i Përgjithshëm i shoqërisë SIGAL në një intervistë për AS tregon se shërbimet e tjera janë pak të kërkuara.

"Sigurimi i jetës është një sigurim që njerëzit nuk e njohin. Në kuadër të sigurimitë të jetës ne kemi edhe pensionet private që është një tjetër produkt shumë i rëndësishëm. Qytetarët duhet t'i drejtohen tregut. Kjo është e vetmja zgjidhje për të mbrojtur çka kanë krijuar, për vete dhe për familjet e tyre"- thotë Ponari.

Sipas Ponarit niveli kaq i ulët i sigurimit të jetës vjen ngaqë shqiptarët e njohin pak rëndësinë e këtij sigurimi. Mjafton që gjithkush të kursejë vetëm 5 mijë lekë të vjera në muaj dhe ai do ta ketë jetën e siguruar. 

"Të gjithë njerëzit duhet të kenë sigurime. E vërteta është se nuk duan të paguajnë. Sigurimi i jetës është përgjegjësi e jotja"- thotë Ponari.

Ponari tregon se janë disa raste në Shqipëri kur është përfituar polica e sigurimit nga familjarët e një personi të siguruar, pas vdekjes së tij. Vlerat më të larta të përfituara janë me 800 mijë euro, 600 dhe 400 mijë euro.  

Albanian Screen