Cameron: Sa të jem kryeministër, s'do jemi pjesë e Eurozonës

LONDER - Kryeministri britanik David Cameron shpjegoi në Parlament veton kundër traktatit të BE-së, në samitin e fundit të unionit europian, që u zhvillua javën e kaluar.
Kryeministri britanik deklaroi se traktati i ri i BE-së përbën rrezik për financat e vendit.
“Sa të jem kryeministër, nuk do jemi pjesë e Eurozonës. Ne kërkojmë mbrojte e siguri për financat tona”, - deklaroi Cameron.
Nderkaq Cameron tha përpara deputetëve se kishte negociuar me dëshirën e mirë dhe se kërkesat e tij ishin modeste, të arsyeshme dhe relevante. Cameron u shpreh se vetoja nuk kishte qenë e lehtë, por ishte një veprim i duhur për Britaninë e Madhe. Ai nënvizoi se Anglia do të angazhohet në “bashkëpunim konstruktiv” me vendet e tjera të BE-së.

Vendimi i Kryeministrit Cameron është shoqëruar me kritika të forta nga ana e opozitës, e cila akuzon për lënien e Britanisë të vetme në përballimin e krizës financiare. Lideri i opozitës, Milliband e akuzoi kryeministrin Cameron se vetoja e tij e ka lënë Britaninë e Madhe pa një zë në Bashkimin Europian. 

Milliband kërkoi që kryeministri Cameron të shprehet qartë se cili ishte kërcënimi për financat e Britanisë, duke theksuar se Cameron nuk mund të pretendonte të bindte vendet e Europës, kur ai nuk kishte bindur ende deputetët dhe anëtarët e koalicionit te tij.  Sipas Milliband, kryeministri vuri përpara interesit kombëtar interesin e partisë së tij.

Por Cameron ka gjetur përkrahje në shumicën e anglezëve, sipas sondazheve të kryera nga shtypi.

Ballkanweb.com