Përgjimet e Veliajt/Botuesit Baze dhe Bollino në akte që duhen verifikuar penalisht. Kush është KM?

Në përgjimet që faqja cna.al publikon sot për komunikimet mes kryebashkiakut të burgosur Erion Veliaj me të vëllain, konsumohet edhe një marrëdhënie me media dhe botues që duhet hetuar penalisht.

Në orën 09:22, Erion Veliaj bisedon me Arbrin dhe i kërkon që t'i marrë një këshillë Meros, ku t'i thotë se me tre dëshmitarë ka ardhur sekseri dhe i ka thënë kaq është paguar për kokën tënde. I kërkon ta pyesë nëse është ‘fishek’ që ia vlen. Po kështu i kërkon të bisedojë me Meron dhe me Fugën.

Në orën 09:31, Erion Veliaj i kërkon Ajolës qe të bisedojë me Meron dhe me KM e t'u marrë një këshillë, pasi Erioni kërkon të dijë që në postimin e fundit të hënën, të tregojë pa dhënë shumë detaje se sa është kërkuar për kokën e tij. Më pas, këtë frazë Erioni e përsërit sërish: ‘Pra është ofru një shumë, erdhi dikush dhe tha ne po tna e paguash këtë, sa ka paguar ai qe do ta fusi brenda e zgjidhim. Tani pyetja eshte ta nxjerrim kete apo jo?’

I thotë se këtë gjë e ka me dëshmitarë, me Dokushin, Isuf Berberin dhe Myslym Murrizin. I kërkon qe t'i thotë që të takohet me Arbrin pasi ai (Erioni) ka nevojë për këshillë

zbardh cna.al përgjimet.

Këtu kemi të bëjmë me inskenime të mirëfillta që synojnë mashtrimin e opinionit publik dhe ndikimin e gjykatës. Në këto kushte mbetet ende e paqartë nëse botuesi Mero Baze duhet thirrur në Prokurorinë e Posaçme për të dhënë sqarime për këtë çështje, sikurse botuesi Carlo Bollino.

Ndërkohë nga fotot e përgjimeve që faqja në fjalë i publikon evidentohet fakti se Veliaj ka kërkuar që përveç Bazes, Endri Fugës, të bisedohet edhe me një subjekt që identifikohet si KM. Ky KM ngjan të ketë të njëjtin tagër besueshmërie si Baze.

P.sh në një pasazh, pasi i vëllai Arbri, i dekaron se sipas “shokut M” lëvizja e e sugjeruar se janë paguar para për ta mbajtur në burg është dëshpëruese, Veliaj kërkon që “të bisedojë me KM, jo të tjerë si dhe kërkon që t’i thotë që është gati t’ia provojë dhe të tregojë tre dëshmitarët që koka e tij kaq vlen”. Mandej Veliaj kërkon që “këtë situatë ta bisedojë edhe me Fugën”.

Për ata që punojnë në media, e dinë se Endri Fuga është telekomanda qeveritare për disa media, por edhe një njohje e vjetër personale e Veliajt. Kështu që këtu janë të gjitha të dhënat për një tërësi veprimesh që synojnë mashtrimin, shantazhin. Vepra penale që duhen sqaruar. Deri më tani SPAK nuk ka përgënjeshtruar përgjimet e publikuara nga can.al.

s.zaimi