Bota po shkon në epokën e para Penicilinës

Emergjenca e re globale e shëndetit pritet të jetë rezistenca e baktereve ndaj antibiotikëve. Tingëllon si një gjë e të ardhmes së largët, apo një skenar që nuk na përket, por faktet flasin për të kundërtën. Në vitin 2019, 5 milionë njerëz vdiqën në mbarë botën për shkak të infeksioneve që rezistonin ndaj trajtimit me antibiotikë, ndërkohë që 1.3 milionë të tjerë lidheshin direkt me këtë shkak.

Në numrin e sotshëm, “Politico” i ka lënë një vend të madh problemit në fjalë, nisur edhe nga fakti i provueshëm se luftërat apo konfliktet po katalizojnë përhapjen e baktereve rezistente, po imponojnë zgjidhje radikale sidomos te fëmijët, të cilëve u amputohen gjymtyrë në mungesë të trajtimit, çka na thotë se problemi po troket në mbarë botën.

E shoh që gjithçka po çon në një shpërthim katastrofik të rezistencën mikrobike në Gaza dhe do të përhapet në të gjithë spitalet e rajonit. Në mos është tashmë në Europë, SHBA dhe në Lindje apo jug. Do të jetë kudo

citon autori, Rory O’Neill, një specialist të OBSH-së.

Aktualisht po flitet për një skenar që do ta çojë botën në periudhën para penicilinës, antibiotiku i parë, i sintetizuar në vitin 1928 që “ndryshoi mjekësinë përgjithnjë”.

Keqpërdorimi i antibiotikëve që pasuan, sidomos në blegtori, ka çuar në përshtatjen dhe rritjen e rezistencës. Lufta me pasojat e veta çon në krijimin e vatrave të infeksionit, dhe është kuptuar se bakteret mund t’i përshtaten edhe toksicitetit të metaleve të rënda. Madje bombardimi në zona lufte, ku përdoret në armatim të ndryshëm zink, apo plumb, po aftëson bakteret të rezistojnë duke e thelluar problemin më shumë.

Tjetër skenar paraqitet në Ukrainë, infrastuktura e së cilës nuk është dëmtuar sa në Gaza. Aktualisht Ukraina ka 100 laboratorë për testimin e rezistencës së baktereve ndaj antibiotikëve, ndërkohë që në vitin 2017 kishte vetëm 3.

Gaza do të jetë me gjasë vendlindja e shumë baktereve rezistente që do përhapen në mbarë botën

citon media në fjalë, Abou Fayed, një mikrobiolog libanez. Mbetet për t’u parë nëse ky alarm do të verifikohet, por fakt është se për rezistencën kundër antibiotikëve dhe nevojën e marrjes së masave, i pari në nivel politik ka folur ish-presidenti amerikan Obama, çka flet për të faktin se problemi ka kohë që njihet, por veprimi vonon. Si përherë.