Pandemia me emrin SHBA

Diktaturat dallojnë nga demokracitë te mënyra si sillen me jetën dhe të drejtat e njeriut. Ky është leksioni bazë që kemi dëgjuar sa herë. Mirëpo ngjan se nuk është edhe aq e vërtetë dhe një provë na vjen nga pandemia e CoVid-19 e cila preku mbarë botën. Agjencia “Reuters” shkruan për një raport, sipas të cilit Pentagoni ndërmori një fushatë diskreditimi për vaksinën kineze, Sinovac, gjatë pandemisë. Operacioni ka qenë klandestin dhe synonte të ngrinte dyshime mbi efikasitetin e vaksinës dhe ndihmën që po jepte Kina në atë situatë.

Vendi i eksperimentimit të kësaj fushate ishin Filipinet, një territor rivaliteti strategjik mes SHBA dhe Kinës dhe teknikisht u realizua përmes telefonatave të maskuara dhe mediave sociale. Agjencia shkruan se ka identifikuar të patën 300 llogari në rrjetin “X” që përputhen me përshkrimet e ish-zyrtarëve amerikanë që kanë qenë pjesë e operacionit në Filipine.

CoVid erdhi nga Kina, mos i besoni Kinës!

Një prej mesazheve në fjalë ishte pjesë e fushatës.

Rrjeti “X” ka verifikuar llogaritë dhe i ka pezulluar duke pranuar se ato ishin pjesë e një fushate të ndërtuar mbi modele aktiviteti dhe të dhënash të brendshme. Jo vetëm përdorimi i llogarive të rreme, por edhe lojërat manipuluese me etikën kanë qenë pjesë e strategjisë së Pentagonit. P.sh në fushatë u përdor propaganda kundër përhapjes së “Sinovac” mes vendeve islame, duke u kujtuar myslimanëve se meqenëse vaksina përmbante xhelatinë derri, ajo është e ndaluar me ligjin fetar të tyre.

Një turp përmbi turpet për një vend që në fillimet e pandemisë adoptoi protokollet kineze të luftës ndaj Sars-CoV-2 duke i prezantuar madje sugjerimet mjekësore edhe në faqen zyrtare të CDC-së. Ka diçka shumë cinike në këtë fushatë; Reuters shkruan se meqenëse ligji ia ndalon Pentagonit që të drejtojë fushatë propagandistike ndaj qytetarëve amerikanë, ajo nuk ka prekur ata, por është gjetur një vend si Filipinet.

Nuk mendoj se kjo gjë mund të mbrohet. Jam jashtëzakonisht i tronditur, i zhgënjyer dhe i deziluzionuar të dëgjoj se këtë gjë e bën qeveria e SHBA

citon agjencia, specialistin e sëmundjeve infektive, Daniel Lucey, që ka marrë pjesë në reagimin ndaj sulmeve me antraks në vitin 2001.

Në një reagim për agjencinë ruse, “Tass”, zëdhënësja e Departamentit Amerikan të Mbrojtjes, Lisa Lawrence, ka deklaruar se meqenëse Kina nisi një fushatë dizinformimi sipas së cilës SHBA nisi përhapjen e CoVid-19, edhe Pentagoni kundërveproi. Është padyshim një rast flagrant dhe domethënës i natyrës së vërtetë të sistemit që drejton sot në SHBA, përtej predikimeve për të drejtat e njeriut dhe lirinë.

SHBA nuk i lë asgjë mangut në këtë kuadër as Iranit të cilin ka dekada që e demonizon, as edhe Rusisë, të cilën që më 2022 shpalli befas se drejtohej nga Hitleri i ri. As edhe Koresë së Veriut, pasi ne me këtë rast mund të kuptojmë se një situatë eventuale lufte, jeta e njeriut do të jetë një mall me vlerë të unifikuar në mbarë globin.

Sikundër dje komunizmi dhe fashizmi ishin toka pjellore për njëri-tjetrin, edhe sot lloji i demokracisë amerikane është fidanishtja e çdo kundërveprimi pasi askush nuk do të shohë e pranojë se pas fasadës ka vetëm një lloj mentaliteti kolonialist që e sheh njeriun në në funksione mekanike. Të mos harrohet se fushata në fjalë, krahas atyre kineze, kanë rrezikuar jetë njerëzish.

s.zaimi