Tani problemi është Netanjahu

Sulmi Iranian mbi Izrael angazhoi një dispozitiv të madh armësh që përfshinin dronë dhe raketa. Megjithatë, me nisjen e sulmit erdhi edhe njoftimi ndërkombëtar se “sulmi kishte nisur” dhe se mjetet do të kërkonin rreth 6 orë të mbërrinin në objektiv. Me këtë rast Izraeli u përgatit dhe siç pritej asgjësoi pjesën më të madhe të mjeteve iraniane.

Pas sulmit Teherani njoftoi se qëllimi u përmbush dhe paralajmëroi Izraelin të mos kundërpërgjigjej. E gjitha një mizaskenë për goditjen që Izraeli i bëri konsullatës iraniane në Siri, duke konfirmuar se të paktën në këtë fazë Irani nuk do konflikt me Izraelin.

Sesa e vërtetë është kjo dhe këtë e dëshmon tërthorazi edhe deklarata e presidentit amerikan Joe Biden, që në një bisedë telefonike me kryeministrin izraelit Beniamin Netanjahu, e ka cilësuar ngjarjen një sukses ushtarak të Izraelit që ka arritur të gjurmojë dhe rrëzojë mjetet iraniane. Mediat amerikane nënvizojnë se Biden i ka deklaruar Netanjahut se SHBA nuk do të marrin pjesë në ndonjë ofensivë kundër Iranit, që duket se po mendohet në Jeruzalem.

Pra çështja po shihet në aspektin politik: Irani dëshmoi se ka kapacitetin dhe kurajën të godasë direkt aleatin kryesor amerikan në Lindjen e Mesme, që është njëherazi edhe fuqi bërthamore, por e ka bërë këtë si gjest më tepër se si operacion ushtarak që do të synonte dëme efektive. Izraeli ka marrë vetëm një kundërpërgjigje për atë që bëri në Siri, nuk u dëmtua dhe me këtë rast SHBA kërkon të mos avancohet më tej, në kushtet kur nuk ka shkaqe reale për të zgjeruar një front të ri.

E gjitha kjo na dëshmon se problem kryesor në Lindjen e Mesme sot për Perëndimin është Beniamin Netanjahu, që nuk po frenohet dhe më keq, po bëhet i paparashikueshëm. Diçka që në politikë nuk pranohet.