Një sfidë e re për Brukselin, protestat e fermerëve

Një valë e re protestash ka shpërthyer në shumë vende të Europës. Ajo që para ca kohësh shihej si shqetësimi i fermerëve francezë i ka kaluar kufijtë e Francës.

Të mërkurën, qindra fermerë protestuan para Parlamentit Europian.

“Na lini të qetë, le të punojmë në paqe!”, tha një fermer nga jugperëndimi i Francës, ndërsa veshur mbante ngjyrat e flamurit të sindikatës së dytë më të madhe franceze të fermerëve, Rural Coordination.

Fermerët në Francë kërkojnë që qeveria të marrë masa për të reduktuar rregulloren dhe taksat mbi karburantin, të cilët thonë se po u zvogëlojnë fitimet. Ata duan që punëtorët e tjerë francezë – përfshirë kamionistët dhe punonjësit e mjekësisë – të bashkohen. Ata po synojnë të fillojnë një lëvizje si protestat masive të Jelekëve të Verdhë që tronditën Francën në 2018.

Mijëra fermerë në të gjithë Evropën kanë dalë në rrugë javët e fundit, duke pretenduar se po preken në mënyrë disproporcionale nga përpjekjet e BE-së për të ulur emetimet e gazeve serrë dhe duke kërkuar më shumë mbështetje financiare nga qeveritë e tyre.

"Ata nuk janë në [BE], ata po eksportojnë tek ne pa taksa ... na kanë hequr tregjet dhe nuk po prodhojnë me të njëjtat rregulla si ne!", thonë ata.

Në Poloni dhe Rumani, fermerët dhe kamionistët kanë bllokuar rrugët në shenjë proteste kundër vendimit të Brukselit për të pezulluar detyrimet e importit për mallrat ukrainase pas pushtimit nga Rusia, të cilin ata e shohin si konkurrencë të pandershme.

Demonstratat kanë nisur edhe në Gjermani kundër një propozimi të qeverisë për heqjen e privilegjeve tatimore, ndërsa fermerët francezë kanë protestuar kundër taksave për karburantin e traktorëve dhe mbirregullimin.

Në të dy vendet, protestat janë bashkuar nga lëvizjet e ekstremit të djathtë që kërkojnë të përdorin pakënaqësinë e fermerëve për përfitime politike përpara zgjedhjeve evropiane në qershor.

Protesta e Brukselit nuk ishte përjashtim, dhe asaj iu bashkua Marion Maréchal, mbesa e Marine Le Pen dhe gjithashtu kandidatja kryesore e partisë franceze të ekstremit të djathtë Reconquête - e themeluar nga Éric Zemmour, një kritik i zëshëm i emigracionit.

"Ndihem i shqetësuar sepse ka të bëjë me sovranitetin tonë," tha Maréchal, duke bërë thirrje për "një ndryshim të linjës politike të Parlamentit Evropian si për politikën e jashtme, ashtu edhe për këtë ekologji ndëshkuese".

Ndërsa në Francë, presidenti Macron ka ofruar mënjeherë dialogun, fermerët nëpër Europë thonë se janë apolitikë.