Mund të ndodhë çdo gjë dhe sërish asgjë nuk ka ndodhur!

 Ngjarja në burgun e Peqinit ka kaluar sot me një reagim skandaloz nga ministri i Drejtësisë, Ulsi Manja. 

Jam këtu sonte dhe do jem në vijim për të nxjerrë të gjitha përgjegjësitë ligjore, administrative, do t’i shkojmë deri në fund kësaj ngjarjeje 

ka thënë ndër të tjera ai. 

Kemi të bëjmë me një vrasje me armë në një institucion që thirret si i sigurisë së lartë. Ministri vetëm për përgjegjësitë institucionale, politike dhe morale nuk foli sepse kjo ngarkon atë në mënyrë taksative me detyrimin e dorëheqjes. 

Dhe nëse ai nuk e bën këtë, kryeministri a ka fuqi ta shkarkojë vallë?

Çdo gjë pra që ndodh në këtë vend, çdo gjë që shkon keq, ka përgjegjës nëpunës dhe qameti ndonjë drejtor. Ndonjë kryetar bashkie që cenon imazhin dhe të tjerat janë llafe kazani. Vrasja në burgun e Peqinit paradoksalisht është pasqyrë e Shqipërisë së jashtë burgut me vrasje e aksidente, trafiqe e korrupsion, ku të gjithë mund të provojnë llotarinë e plaçkitjes, por askush nuk ka të drejtë të kërkojë llogari dhe përgjegjësi politike. E çuditshme pra në kushtet kur neve na është bërë e qartë filozofia e qeverisë se “sistemi korrupton njerëzit” dhe jo e anasjellta. 

E çuditshme sesi vetë prozatorët e këtij sistemi përgënjeshtrohen nga veprat e vartësve të tyre, sesi ngjarje si këto i bëjnë apel parimeve të një qeverie që është murtajë e gjatë për mbarë këtë shoqëri. Çfarë duhet të ndodhë që një përfaqësues politik të thotë: dështova, po largohem? 

Me këta që janë në pushtet çdo gjë të ndodhë, sjellja nuk ndryshon. Sepse ata që kanë një minimum njohurie për llojin e gjedhit që është në krye e dinë se mendësia sunduese në këtë elitë është se Ne qeverisim se na takon. Të tjerët qëndrojnë Poshtë. 

s.zaimi