Ironike/Shërbeu për ta bërë Kurtin një lloj heroi

Nëse sheh reagimet pas konferencës së Edi Ramës sot, e kupton se ka një pakënaqësi masive ndaj vendimit të tij për anullimin e pjesëmarrjes në mbledhjen e përbashkët me qeverinë e Kosovës. Kjo edhe pse z. Rama nuk arrin dot shumë shpesh që edhe kur jep arsye formalisht bindëse të tingëllojë i besueshëm. I bërë si pulë e rrahur, me zë të lodhur, i njëjti njeri që hakërrehet ndaj Europës për amnistinë fiskale, sot u pa të zbythej sikur t’i kenë komunikuar qametin. 

Zoti Rama mund të ketë mbështetje ngado, në BE, ShBA. Ai mundet edhe të votohet masivisht, atij i ngrihen edhe mëngë. Por zoti Rama e di se nuk ka qenë asnjëherë ajo që ai ka ëndërruar: heroi i vetëm i shqiptarëve. Ai, emri i të cilit të dallojë nga të tjerët. Sa herë janë dashur qëndrime të forta, që lidhen me përgjegjësi reale, z. Rama ka bërë atë që di më mirë: të dredhojë. Dhe meqenëse siç thotë ai “shqiptarëve nuk ua ha qeni shkopi për politikë”, është e qartë se askush nuk e merr atë për heroin e ndryshimit, as atin e modernizimit. E marrin për atë që është: dallaveraxhiu më i suksesshëm në Tiranë. 

Ajo që z. Rama ka bërë sot, apo ka qenë i detyruar të bëjë, ka pasoja të cilat ai i kupton fare mirë: përveçse ka diskredituar veten përballë një kategorie shqiptarësh që nuk e kuptojnë dot këtë qëndrim, z. Rama ka ndihmuar ta bëjë Kurtin të duket si ai heroi i vetmuar, rruga e të cilit ndiqet vetëm nga disa dishepuj dhe ka si destinacion sakrificën. Pak rëndësi ka nëse kjo është e vërtetë, në këtë rast z. Rama, të cilin e mbajnë për mjeshtër të imazhit, shërbeu si katalit për glorifikimin e Albin Kurtit, me të cilin sot në sytë e shumëkujt e ndan një diferencë e madhe morale dhe kapaciteti për të mbrojtur qëndrimet e veta.  

Ajo që bën Kurti sot nuk është diçka e komplikuar: ai po luan me virtytin e njeriut në krye të qeverisë, diçka që është harruar ndër shqiptarë. Nuk hyjmë në motivet e tij, por shfaqjen. Nga ana tjetër akuza për antiamerikanizëm është e sajuar keq sepse proamerikanër kryesorë qëllojnë të jenë ndër më të korruptuarit ndër shqiptarët. Për ta kuptuar sesa e qartë është kjo mjafton të lexojmë situatën në Shqipëri: PS-ja fiton sepse opozita është njësoj me të, e diskredituar, e pamoralshme, servile e ambasadave dhe mbushur me të korruptuar. Ky është mesazhi që vjen ngado ta lexosh sjelljen e një pjese të elektoratit dhe këtu do kuptuar dashamirësia ndaj Kryeministrit të Kosovës. 

Ka një arsye shumë të rëndësishme në të gjithë këtë: historia e secilit kushtëzon rezultatin. Kurti nuk ka dosje të hapur kund, karriera e tij lidhet me protestat. Çfarë mund të themi për z. Rama! Sado racional të jetë qëndrimi i tij, ai mban era pafuqi, dobësi, hile. Dhe këto intuitizohen duke prodhuar një faturë që fryhet shumë për shkak të kontrastit me Kurtin, ai kontrast që nuk ekziston në Tiranë. Le ta kuptojnë pra edhe ata që e marrin për të pathyeshëm z. Rama sesa i dobët është dhe se arma ndaj tij është bazike: ndershmëria reale që mban në këmbë mandej një politikë të besueshme. 

s.zaimi