Kundërofensiva ukrainase përballë një Rusie që ka mësuar nga gabimet

Përgjatë 15 muajve të fundit, forcat e Kievit janë përballur me një armik që ka bërë gabime, por edhe ka pësuar pengesa. Analistët ushtarakë thonë se Moska ka mësuar nga ato gabime dhe ka përmirësuar armët dhe aftësitë e saj.

Rusia ka ndërtuar mbrojtje shumë të fortifikuara përgjatë vijës së frontit prej 1000 kilometrash (600 milje), ka përmirësuar armët e saj elektronike për të reduktuar avantazhin e Ukrainës në dronët luftarakë dhe i ka kthyer bombat e rënda nga arsenali i saj masiv i epokës së Luftës së Ftohtë në municione precize, të afta për të goditur objektivat pa vënë në rrezik avionët e saj luftarakë.

Ndryshimi i taktikave ruse, së bashku me numrin e shtuar të trupave dhe armatimin e përmirësuar, kërcënojnë ta kthejnë luftën në një betejë të gjatë rrënimi.

Presidenti ukrainas Volodymyr Zelenskyy tha të shtunën se ofensiva kundërsulmi dhe mbrojtëse janë duke u zhvilluar kundër forcave ruse.

Sir Richard Barrons, gjeneral në pension, i cili udhëhoqi Komandën e Forcave të Përbashkëta të Mbretërisë së Bashkuar, tha se ushtria ruse ka ndërtuar linja mbrojtëse dhe ka rishikuar taktikat e e saj pas tërheqjes së nxituar nga zona të gjera si Kharkivi dhe Khersoni vjeshtën e kaluar.

Rusia ka shtuar trupat për të mbrojtur vijën e gjatë të frontit, edhe pse shumë prej tyre mund të jenë të trajnuar dobët, tha Barrons për AP.

Trupat ruse vazhdojnë të vuajnë nga morali i ulët, ka mungesë municionesh dhe koordinimi ndërmjet njësive ka mbetur i dobët. Përleshje të egra të brendshme kanë shpërthyer midis trupës ushtarake dhe kontraktorit ushtarak privat Ëagner, i cili ka nxjerrë dhjetëra mijëra mercenarë në terren për të udhëhequr betejën për Bakhmut.

Një faktor kryesor që ende kufizon aftësinë e Rusisë ka qenë vendimi i saj për të kufizuar hyrjen e forcave të saj ajrore thellë në hapësirën e Ukrainës pasi pësoi humbje të mëdha në fazat fillestare të luftës. Përpjekjet e saj për të rrëzuar mbrojtjen ajrore të Ukrainës kanë dështuar. Falë furnizimeve me armatim perëndimor, Ukraina tani paraqet një sfidë edhe më të frikshme për avionët rusë.

Barrons thekson se është thelbësore që liderët ushtarakë në Kiev të vazhdojnë të mbajnë larg avionët luftarakë të kundërshtarit, në mënyrë që "kundërofensiva të mos jetë momenti kur forcat ajrore ruse befas gjejnë aftësinë dhe guximin e saj dhe sulmojnë në të gjithë Ukrainën".

Analisti ushtarak ukrainas, Oleh Zhdanov vëren se Moska ka ruajtur një avantazh numerik në trupa dhe armë, pavarësisht nga çdo dobësi.

Ndërsa Rusia ka shfrytëzuar gjithnjë e më shumë arsenalet e saj të Luftës së Ftohtë, duke nxjerrë tanke që datojnë në vitet 1950 për të plotësuar humbjet e mëdha, të hershme, armë të tilla të vjetra ende mund të funksionojnë mirë, tha Zhdanov.

Rusia ka modernizuar stokun e bombave për t'i kthyer ato në armë që janë provuar efikase. Bombat 500 kilogramëshe  të përshtatura me një modul GPS mund të shkaktojnë dëme masive.

Një bombë e tillë e lëshuar aksidentalisht mbi qytetin rus të Belgorod pranë kufirit me Ukrainën në prill hapi një krater të madh dhe plagosi lehtë një person.

Këto konvertime u lejojnë forcave ajrore ruse të rrisin sulmet ndaj forcave ukrainase pa rrezikuar avionët luftarakë.

Sistemet e përmirësuara të luftës elektronike ruse kanë shkatërruar rreth 10 000 dronë ukrainas në muaj dhe ia kanë dalë të përgjojnë dhe deshifrojnë komunikimet taktike të Ukrainës në kohë reale.

Ato kanë mësuar të kapin raketa të drejtuara nga GPS të lëshuara nga artilieria e furnizuar nga Perëndimi si HIMARS i prodhuar në SHBA.

Ushtria ruse "është në gjendje të përmirësojë dhe të evoluojë përdorimin e sistemeve kyçe", thuhet në një raport të Royal United Service Institute, institut me bazë në Londër që fokusohet në çështjet e mbrojtjes dhe sigurisë. Raporti vuri në dukje se Rusia mund t'i përgjigjet efektivisht riformatimeve të ngjashme të shpejta nga Kievi.