Ministrja e Jashtme njofton se nuk është mirë

E shokuar përtej asaj që mund të thuhet

Në këtë gjendje të rëndë ndodhet në këto orë ministrja e Jashtme e Shqipërisë, Olta Xhaçka, e cila i ka kthyer në profilin e vet Twitter, përgjigje ministrit britanik për Emigracionin, Robert Jenrick. Ky i fundit paraqitet në një video ku flet me një gjuhë tipike të politikanëve të sotshëm që pretendojnë vendosmëri dhe vullnet duke rënduar terminologjinë. Staf i mrekullueshëm, thotë ministri për njërëz të kufirit apo emigracionit që janë tanimë në qendër të diskutimeve publike në Britaninë e Madhe që po zbulohet se nuk di të luftojë imigracionin. 

Replika e ministres Xhacka në atë profil është padyshim një lëvizje propagandistike që ka brenda edhe potencialin e një police shëndeti. Ta zëmë, nëse zonja nuk del dot nga kllapia emocionale që e ka zënë për shqiptarët që kalojnë La Manshin, në eventualitetin teorik të zhvillimit të kësaj gjendjeje të rënduar në një formë patologjike psiko-neurotike, apo psiko-somatike, atëherë vetë fakti publik i debatit online do të shenjohet si shkak për sëmundjen dhe kështu qeveria britanike shpresojmë se do të bëjë gjestin fisnik të mbulimit të shpenzimeve të kurimit. Sepse “Britania i paguan përherë borxhet e saj”. 

Ne urojmë kjo të mos ndodhë asnjëherë, pasi format moderne të dambllasë implikojnë stresin, ndërveprimin e shumë faktorëve nën presionin e pashmangshëm të intensitetit informativ duke krijuar lezione të pakthyeshme. 

Ajo që të çon në këtë vlerësim të gjendjes së ministres në të vërtetë është gjuha tërësisht artificiale e saj. Zonja Xhaçka njihet për një cilësi në atë vend kune kanë ulur: di ta mbajë gojën mbyllur. Mirëpo burime në partinë e saj po thonë se zonjës i kanë shpëtuar ca komente për shefin e saj, qoftë pse ka dëgjuar se mund ta lëvizë, apo ta lërë si të “barabartë para ligjit”, qoftë se është në natyrën njerëzore kjo gjë. Dhe kjo e fundit është lajm parimisht i mirë.

Si xhanëm u shokoka një ministre nga deklaratat e një homologu në Britani dhe nuk e shokon ikja e njerëzve të vet nga vendi ku ajo qeveris? Si xhanëm qeveria e Shqipërisë kujtohet për Ikjen vetëm kur duhet të ushtrojë sportin e ri të replikës parimore me qeveri të huaja dhe jo duke e bënë atë në qendër të ndërhyrjes me politika? 

Të gjithë e dinë që zonja Xhaçka është shëndoshë e mirë, more qiqër. Statusi i saj, sikundër ato të shefit të vet, janë asgjë më shumë sesa fushatë elektorale për votat e “çunave të Londrës”, që ka nisur t’i peshkojë qëkurse “u çoi aeroportin në Kukës”. Dhe mandej me amistinë fiskale që për shumëkënd mban të hapur me ligj një linjë fluksi parash nga jashtë në sektorin e pasurive të paluajtshme që nuk i përgjigjet më asnjë mirëqenieje apo ekonomie në Shqipëri. 

Ndonëse për ironi, qeveria britanike po i kthen shqiptarët sepse nën vlerësimin europian dhe të vetin se “Shqipëria është një vend i begatë dhe i sigurtë”, ndaj nuk ka sesi të miratojë azilkërkimin nga shqiptarët. 

s.zaimi