Kur të zë Harbuti derën!

Shiheni këtë video për të kuptuar se ku përfunduam. Se çfarë bën një gagarel që është kryeministër, sesi një popull që ka vetëm ankesa, rri gati - tu para një të këtilli që të vjen në derë të punës tënde, të merr shërbimin në pronën tënde dhe pastaj të bën një rreshtore me pyetje dhe përgjigje mbi progresin e zonës.

Dhe zotëria që flet aty mesa duket është pronari i lokalit, apo hotelit që i jep xhevap harbutit të rehatuar në karrige si Plaku Merre që jep urdhëra e merr në pyetje të Zotin e Punës. Ose ai që shfaqet si i tillë.

Ka pronar të tillë në Shqipëri? Vërtet që “klienti është mbret”, por ky që shohim në video nuk sillet si mbret, por si xhandar që ka hequr rripin e po tund thuprën gati.

Pyetja këtu është: si vallë këtij njeriu i shijon kjo shfaqje kapadaillëku? Kjo kapardisje arrogante në punë të tjetrit?

Po si ore të vijë tjetri, megjithë fëlliqësinë politike që përfaqëson e të zërë karrigen duke bërë pyetje e duke marifetosur një kinopolitikë të ndyrë për t’u treguar të gjithëve se ky është shefi?

Kjo është Shqipëria e vërtetë. Kokëulur dhe pa dinjitet, ku nuk ka asnjë siguri veçse të momentit, të çastit.

Si ore të gëllitet çdo gjë në këtë vend, të të hapin derën e të të hyjnë brenda serbes-serbes? E të të japin edhe leksione sesi gatuhet trahanaja, po xhanëm edhe sesa djegës është speci këtë vit pas provave gjenerike në vetë të parë.