Digjitalizimi i prostitucionit, një migrim nga rruga në internet

Ashtu si në çdo aktivitet tjetër, interneti ka ndikuar edhe në prostitucion. Në Spanjë, profesori i Universitetit të Valencias, Antonio Arino, ka kryer një studim pasi ka shqyrtuar rreth gjysmë milioni reklama prostitucioni në faqe dhe forume klientësh.  

"Ka një korridor mesdhetar prostitucioni," thotë për El Pais profesor Antonio Ariño. Në shumicën e kodeve postare që prekin detin, nga kufiri me Francën në Girona deri në Kadiz, gjendet një banesë ose ambiente të dedikuara për këtë aktivitet. Lehtësia dhe liria e ofruar nga interneti për të kontaktuar ofruesit e këtij shërbimi dhe për të ditur se çfarë mund të gjendet në secilën prej tyre ka krijuar një shpërndarje të shtëpive publike, si nga periferitë e qytetit, ashtu edhe nga zonat urbane, si edhe në kohë. Nuk është më e nevojshme të shkosh në një klub nate ose të telefonosh për të organizuar një takim, tani ky menaxhim është transferuar në rrjet. “Ka një migrim masiv në internet. Është bërë një fenomen i ri”, thotë Ariño ndërsa jep detaje të studimit të parë madhor mbi gjendjen e prostitucionit në Spanjë.

Ariño, profesor i Sociologjisë në Universitetin e Valencias, ka bashkëpunuar me një ekspert të dhënash, Rubén Rodríguez Casañ, për të kuptuar më mirë se çfarë ndodh me prostitucionin në internet.

Opsionet online për të filtruar kërkesat janë zgjeruar në karakteristikat fizike, llojet e trupit, grupet etnike, origjinën, moshën, shërbimet e ofruara, nga agjencia ose organizata e pavarur, sipas ofertave, sipas çmimeve, sipas kohës ose aksesit në parkim falas. Dhe ka edhe njëfarë libri përshtypjesh.

Në total, studimi ka analizuar rreth gjysmë milioni reklama prostitucioni në gjashtë faqe dhe autorët kanë zbuluar disa ndryshime për shkak të këtij transferimi në internet. “Deri vonë, nëse flisje për seksin me pagesë, menjëherë e lidhje me klubet në periferi me drita neoni. Sot, duke qenë se kontakti vendoset përmes internetit, nuk është më e nevojshme që këto vende të jenë të dukshme. Ato janë të fshehura brenda qytetit”, tregon Rodríguez Casañ. Ariño flet për një "zhvendosje urbane të prostitucionit", por jo në një lagje specifike, por "përmes shpërndarjes dhe përhapjes nëpër strukturën urbane: në disa raste, kjo shpërndarje ndodh përgjatë një rruge tërthore ose unaze, siç mund të shihet në qytete si Valencia dhe Alicante".

"Në internet, reklamat punojnë me logjikën e sigurimit të informacionit maksimal dhe të gjitha detajet e 'mallrave' që mund të jenë të rëndësishme për klientin, domethënë të personit si 'objekt i shkëmbimit komercial'," përfundon studimi. Çmimi mesatarisht lëviz mes 50-60 euro një gjysmë ore dhe 100 euro për një orë.