Kriza e klimës rrezikon një të tretën e prodhimit të ushqimit

Një e treta e prodhimit global të ushqimit do të jetë në rrezik në fund të këtij shekulli nëse emetimi i gazeve serë vazhdon të rritet me ritmin aktual.

Studiuesit në Universitetin Aalto në Finlandë kanë llogaritur që rreth 95% e prodhimit aktual të të korrave merret në zonat që ata i përcaktojnë si "hapësirë ​​e sigurt klimatike", ose kushte ku temperatura, reshjet dhe thatësia bien brenda kufijve të caktuar.

Por nëse temperaturat rriten me 3.7C, deri në fund të këtij shekulli, kjo zonë e sigurt do të tkurrej në mënyrë drastike, duke prekur kryesisht Azinë jugore dhe jug-lindore dhe zonën Sudano-Saheliane të Afrikës.

Sidoqoftë, nëse gazrat serrë zvogëlohen dhe bota përmbush objektivat e marrëveshjes së Parisit, në kufizimin e rritjes së temperaturës në 1.5C ose 2C mbi nivelet para-industriale, atëherë vetëm rreth 5% -8% e prodhimit global të ushqimit do të rrezikohej.

“Një e treta e prodhimit global të ushqimit do të jetë në rrezik. Ne duhet të shqetësohemi, pasi hapësira e sigurt për klimën është mjaft e ngushtë. Por ka masa që mund të marrim në uljen e emetimeve të gazrave serë. Dhe ne duhet të fuqizojmë njerëzit dhe shoqëritë në zonat e rrezikut, për të zvogëluar ndikimin dhe për të rritur qëndrueshmërinë dhe aftësinë e tyre adaptive", thotë Matti Kummu, profesor i asociuar i ushqimit dhe ujit në Universitetin Aalto.