Zbythja për Teatrin ka këtë fytyrë

Shtyrja që Kuvendi i bëri shqyrtimit të dekretit për Teatrin me kërkesë të të vetëpërdorurit Eduard Shalsit rezultoi një tjetër taktikë bajate për t’u tërhequr provizorisht nga paçavurja “Fusha” që nuk kapërdihet as me vaj dhe as me uthull.

Opinioni negativ që mesa duket qeveria ka marrë nga Komisioni Europian pas ankesës së aktorëve, ka zbythur qeverinë që nxorri Erion Veliajn ta recitojë si lajm dashamirës, rol që ky i fundit e bën me vullnet të plotë përknudrejt çdo kostoje mbi lëkurën që i ka veshur zotëria i Bashkisë fytyrës së tij.

“Nuk ka asnjë dyshim që ne do të kemi një teatër të ri! Në fazën ku jemi, kemi një diskutim të hapur ditor edhe me miqtë dhe dashamirësit e Tiranës në Komisionin Europian, për të mbërritur në një draft, i cili sigurisht kënaq shumicën dërrmuese të popullsisë së Tiranës dhe të Shqipërisë, që do një Teatër të ri. Por, sigurisht u heq alibinë, ankesat, sebepet për sherr edhe asaj minorance që do të bllokojë zhvillimin e Tiranës. Dhe besoj në një draft të dakordësuar me Komisionin Europian. Ne shumë shpejt do të kemi bazën ligjore të nevojshme, procesin e nevojshëm transparent dhe të hapur për të gjithë, dhe në fund fare një Teatër të Ri për Tiranën”-theksoi kryebashkiaku që kishte filluar numërimin mbrapsht për futjen e buldozerëve që do të shembnin godinën ekzistuese.