Ushtria ka 7 muaj pa Shef Shtabi – vërejtja vjen nga LSI-ja

Nënkryetari i Lëvizjes Socialiste për Integrim, Luan Rama, ka cilësuar dje gjatë një interviste në studio televizive se përballjet mes Presidentit dhe Kryeministrit kanë çuar në mosemërimin e një Shefi të Shtabit të Ushtrisë.

“Në mënyrë skandaloze, Shqipëria vend anëtar i NATO-s ka mbi 6-7 muaj pa shefin e Shtabit të Përgjithshme të Ushtrisë. Në vjeshtë në shtator do të mbahet në Tiranë Samiti i Shefave të Shtabeve të vendeve anëtare të NATO-s. Cili është mesazhi i sjelljes së përgjegjshme apo jo të politikanëve tanë në raporte dhe me këtë aleancë? Është papërgjegjshmëri që buron prej mungesës së edukatës së partneritetit, të bashkëpunimit dhe të luajalitetit midis institucioneve, sepse shefi i Shtabit të Përgjithshëm është një emërtesë që kalon nga Kryeministri te Presidenti i Republikës. Pra janë lidhur apo janë kapur pas një emri dhe kanë 7-8 muaj që e kanë lënë ushtrinë pa komandant”, – u shpreh Nënkryetari i LSI-së. Në këtë detyrë deri së fundmi ka qenë Jeronim Bazo të cilit i ka përfunduar mandate.