Suksesi i konçesionuar i Erion Veliajt

Ka një lloj konstatimi se kryetari i ri i Bashkisë, Erion Veliaj pamvarësisht retorikës shumë herë të tepruar që përdor në daljet publike po kryen disa punë që kontrastojnë dukshëm me “gjumin” e ish-kryebashkut Lulzim Basha. Në më shumë se 1 vit që drejton bashkinë e kryeqytetit Erion Veliaj ka rritur koston e transportit publik, ka taksuar parkimin e automjeteve dhe ka marrë autorësinë e të paktën 2 veprave të mëdha publike, Bulevardit të Ri të Tiranës dhe Pazarit të Ri, për të cilat Partia Demokratike thotë se janë projekte të nisura nga ish-kryetari Basha. Përtej arsyeve që justifikojnë ose jo vonesat e ish-kryetarit Basha në realizimin e projekteve që ai shpalosi për Tiranën, disa fakte i japin të drejtë argumenteve se suksesi i shpejtë i zotit Veliaj në përfundimin ose avancimin e disa projekteve është i konçesionuar nga qeveria qëndrore në vazhdën e një investimi politik të kryeministrit mbi ish-drejtuesin e Lëvizjes Mjaft dhe Partisë G99. Kjo e fundit dështoi plotësisht ne zgjedhje si parti politike.

Le të shohim me radhë projektet.

Bulevardi i Ri i Tiranës

Bashkia pritet të inagurojë shumë shpejt disa punë publike, mes të cilave segmentin e parë të Bulevardit të Ri dhe sheshin qëndror të Tiranës. Projekti i parë që lidhet me zgjatimin e aksit qëndror të Tiranës u fillua si vepër në shtator të vitit 2013 me iniciativën e kryetarit të atëhershëm. “Sot jam i lumtur se do të hapim një korrodor të ri për Tiranën, për punësimin dhe gjelbërim. Dy vjet më parë e premtuan këtë projekt dhe po e mbajmë pramtimin”- deklaroi Basha asokohe.http://objektiv.al/basha-premtimi-i-mbajtur-per-bulevardin-e-ri-te-tiranes/. Por me ardhjen në pushtet të socialistëve punimet stopohen nga një institucion në varësi të qeverisë. Në 6 mars 2014 Drejtoria e Inspektoratit Ndërtimor Urbanistik Kombëtar me kërkesë të Prefekturës pezullon punimet me argumentin se ka patur ankesa të herëpashershme të qytetarëve të Tiranës.http://shqiptarja.com/mobile/artikull_old.php?IDNotizia=203894. Por ky argument as që merret parasysh pas ardhjes në krye të bashkisë së zotit Veliaj. Policia dhe Forcat Rena ndërhyjnë me forcë duke nxjerrë banorët nga shtëpitë që prekeshin nga ky projekt.

Projekti i Pazarit të Ri

Erion Veliajt iu desh afërsisht 1 vit për të inaguruar rikonstruksionin e Pazarit të Ri në sheshin Avni Rustemi. Edhe ky projekt i ka fillesat në fundin e mandatit të Lulzim Bashës si kryetar bashkie i Tiranës. Në Prill të vitit 2015 Lulzim Basha dhe  Presidenti i Fondit Shqiptar-Amerikan të Ndërmarrjeve dhe bordit të Fondacionit Shqiptaro-Amerikan të Zhvillimi, Michael Granoff lajmëruan arritjen e një marraveshje për financimin e këtij projekti. Granoff vuri në dispozicion  2.3 milionë dollarë për këtë projekt që kushtonte 6 milionë dollarë. http://www.panorama.com.al/basha-prezanton-projektin-e-pazarit-te-ri-model-per-rajonin/.“I kërkoj të mbështesë këtë projekt, të mos e bllokojë, të bëjë të mundur hapjen e punimeve, në mënyrë që Pazari i Ri të kthehet në një pikë referenciale, estetike, kulturore, të një kulture të re sipërmarrjeje, të një frymëmarrje të re urbane dhe të një shprese të re” theksoi në atë kryebashkiaku Basha. Por qeveria e zotit Rama nuk zhbllokoi asnjë fond për këtë projekt në pritje që suksesi t’i vishej zotit Veliaj ashtu siç edhe ndodhi.

Taksimi i transportit publik dhe refuzimi për financimin e tramit

Tirana ndoshta është një nga kryeqytetet e vetme në botë me shërbimin më të keq të transportit publik. Në këtë çshtje zoti Veliaj ka ndërmarrë dy hapa, rritjen e biletës për autobusët urbanë dhe taksimin e parkimit të automjeteve në kryeqytet. Kosto që i mbivendosen qarkullimit të makinave, përdorimi i të cilave është në raport të zhdrejtë me kohën dhe intensitetin e lëvizjes. Nëse qeveria aktuale do të tregohej më bashkëpunuese, çështja e transportit publik mund të kishte marrë një zgjidhje tjetër. Në Qershor të vitit 2014 ish-kryetari i atëhershëm prezantoi projektin për tramin e Tiranës. Qeveria franceze akordoi një grant prej 7 20 000 eurosh, me anën e të cilit u krye studimi i fizibilitetit dhe projekti i linjës Kombinat –Kinostudio. Transporti me tram në këtë linjë do të përgjysmonte kohën e udhëtimit. http://acp.al/profil_projekt.php?id=154. Kosto e përgjithshme e projektit, u vlerësua në rendin midis 120 dhe 155.5 milionë euro. Realizimi parashikohej me koncesion ose partneritet publik- privat, ku partneri publik, ishte  Bashkia e Tiranës dhe kërkohej një garanci sovrane e qeverisë e cila nuk u dha nga zoti Rama, për t’i hapur rrugë një politike për ndërtimin e parkingjeve në kryeqytet.

Epilogu

Pra suksesi kinkalerik dhe me kosto arbitratre i Veliajt buron nga qeveria dhe fondet që ajo jep në funsksion të karrierës së kryebashkut të Tiranës, i cili me një marrëveshje aspak transparente vendosi t'u shesë banorëve  të kryeqytetit deri edhe qeset plastike.