Kërkesë për heqjen e vulës së sulltanit nga fasada e Xhamisë së Parrucës në Shkodër

Drejtue kryebashkiakes, zojes Voltana Ademi*

Para do kohe isha në Shkodër, ku kam parë një gja që më ka habitë e më ka lanë pa mend. Në fasadën publike të Xhamisë së Parrucës, nga ana e rrugës kryesore, Myftiu i Shkodrës, imami Muhamed Sytari kishte vendosë një shkrim osmanisht me përmasa të stërmdha rreth pesë metra me dy metra. Ky shkrim osmanisht më kujtoi njënën faqe të një monedhe të vjetër turk-osmane. Pyeta disa miq muslimanë shkodranë dhe kosovarë për kuptimin e këtij shkrimi, por asnjëni prej tyne nuk dijti t’ma spjegonte. Atëherë iu vuna vetë studimit nga ku nxora se:

 Në pjesën ma të sipërme të stemës së perandorisë turk-osmane asht nji rreth ngjyrë të gjelbërt, që osmanisht quhet “tugra” e sulltanit. Duke vazhdue kërkimet, konstatova se kjo “tugra” asht në fakt “myhyri” apo vula e sulltanve, dhe se shkrimi në fasadën e Xhamisë së Parrucës në Shkodër asht identik me “tugren” apo “myhyrin” pra “vula” e sulltanve. Poshtë nga e majta e shkrimit osmanisht në fasadën publike të Xhamisë së Parrucës, asht shtuar data “1379” dhe djathtas mbrenda “tugrës” një datë tjetër “1761 ose 1769”. Po djathtas nga sipër, jashtë “tugres” apo vulës së sulltanit, shifet nji shkrim tjetër osmanisht, i cili duket të jetë një shprehje fetare, që lartëson vulën e sulltanve.

Data e parë 1379 e shkrimit osmanisht në xhaminë e Parrucës përputhet (afërsisht) me datën e betejës së Fushë – Kosovës të sulltan Muratit të I-rë, mbas së cilës ushtritë e turqve osmanë filluen pushtimet e tyne të mëdha në Ballkan dhe shënuen fillimin e humbjes së pavaresisë së principatave shqiptarë. Ndërsa data e dytë 1761 (ose 1769) mendoj se mund të ketë lidhje me ndonjë datë me randësi të ndonjë pashai shkodran.

 Lindë pyetja: Pse myftiu i Shkodrës imami Muhamed Sytari nuk ka vue në fasadën publike të Xhamisë së Parrucës për shembull një shprehje fetare islame në gjuhen shqipe për harmoninë fetare, por ka vue në osmanisht, sot mbas një shekulli Pamvarsie të Shqipnisë, vulen e sulltanve të kalifatit islamik, të pushtuesve turq-osman masakrues të popullit shqiptar? A thue se xhamija nuk shërben për lutje fetare, por asht një garnizon i dikurshëm turk-osman ?!

 Imagjinoni Ju lutem vetëm për një minutë zoja kryebashkiake, se sa do të trumbetohej me të drejtë si veprim antikombëtar dhe skandaloz, sikur nëpër fasadat e kulteve të tjera fetare të vendoseshin stemat e mbretënve të dikurshëm pushtues sllavë o grekë o eruopianë !!!!

 Un mendoj se rranjët e këtij veprimi të myftiut të Shkodrës, imamit Muhamed Sytari, duhen kërkue tek Enver Hoxha, i cili në vitin 1967 prishi Kisha dhe Xhamia dhe zhduku kleret tona fetare tradicionale. Për të mbushë këtë boshllek klerikësh, mbas vitit 1990, shumë të rinj shqiptarë u dërguen për studime teologjike në vendet arabe, prej ku sot po na sjellin shumë gjana negative, që në vendin tonë nuk i kemi pasë, deri edhe evokimin dhe hymnizimin e perandorisë pushtuese turk-osmane.

 E nderta kryebashkiake, zonja Voltana Ademi !

 Vendosja në fasaden publike të Xhamisë së Parrucës në Shkodër e vulës perandorake të sulltanve të kalifatit islamik të pushtuesve turq-osman:

 1 – Asht një veprim antiligjor, sepse bjen në kundërshtim me vendimin e parë të Qeverisë së Parë Shqiptare të datës 28 Nandor 1912 në Vlorë mbi Shpalljen e Pamvarsisë së Shqipnisë nga pushtuesi turk-osman, vendim që asht në fuqi edhe sot.

 2 – Asht një veprim antikushtetues, sepse institucionet fetare në Shqipni me ligjë janë të shkëputuna nga Shteti dhe me ligj, institucioneve fetare u asht ndalue të merren me politikë, ose të bëjnë në kultet fetare propagandë politike.

 3 – Asht një veprim antikombëtar, sepse hjedh baltë mbi gjakun e mijëra patriotëve shqiptarë të qyteteve tona, të fushave tona dhe të maleve tona, të cilët pa asnjë dallim fetar, si vllazen, dhanë jetën e tyne gjatë luftrave shekullore për Pamvarsinë e Shqipnisë nga pushtuesi 500 vjeçar turko-osman.

 4 – Asht një veprim shumë i damshëm për mbarë shqiptarët edhe nga pikëpamja politike ballkanike. Shqiptarët nuk kanë asnjë interes politik të jenë hyzmeqarët e njenës apo tjetrës palë, të dy pretendentëve antishqiptarë shumë shekullorë në Ballkan, siç janë Turqia dhe Rusia. Vetem rruga europiane u garanton shqiptarëve një siguri politike, një siguri ushtarake dhe një perspektivë ekonomiko – kulturale. Këtë e vërteton shkëputja e Kosovës nga Serbia dhe futja e Shqipnisë në Nato. Jeta vërtetoi se çdo rrugë tjetër asht e gabueme dhe me pasoja fatale.

 Mbasi tash më shumë se 100 vjet s’asht ma Shkodra vilajet turk, si dhe per arsyet që ma nalt tregova, un, si qytetar i vjetër i këtij qyteti, kërkoj nga Ju zonja kryebashkiake: së pari ta verifikoni Ju vetë kuptimin e atij shkrimi osmanisht në fasadën publike të Xhamisë së Parrucës dhe pastaj, mbasi Ju jeni personi me kompetencë të plotë në Shkodër për problemet publike të qytetit, kërkoj:

 të urdhnoni heqjen sa më parë të vulës perandorake të sulltanve të kalifatit islamik të pushtuesve turq-osman nga fasada publike e Xhamisë, fakt që është pa preçedent në Shqipni dhe në Ballkan.

 Përfundoj me bindjen për mirëkuptimin dhe ndërhymjen Tuej.

Me nderime!

*Kërkesa i është dërguar Kryetares së Bashkisë së Shkodrës, Voltana Ademi në faqen e saj zyrtare në Facebook