Blloku Politikë

Ilir Beqja, ish-ministër i Shëndetësisë, ka dhënë sot në një intervistë për A2 përmes së cilës ka mbrojtur idenë e rajoneve që është propozuar së fundmi nga qeveria.

Nuk po i monopolizojmë fondet e BE, nuk është ky mentaliteti me të cilin mund të shkosh në BE,  por BE ka disa parime dhe standarde, dhe nuk pranon të financojë komunitete që nuk janë në gjendje të komunikojnë me Brukselin

thotë z. Beqja. 

Jordan Daci, që prezantohet zakonisht si konstitucionalist, publikon sot një shkrim në gazetën “Panorama” titulluar: Sot i gjithë populli duhet të jetë opozitar.

Ndër të tjera z. Daci shkruan se:

Hetimi për të famshmen Toyota Yaris është mbyllur me komiken akuzë: Mosdeklarim të ardhurash në kufi.

Pra gjashtë persona do të ndiqen dhe hetohen se pse nuk deklaruan burimin apo se kishin me vete 3.4 milionë euro.

Që nga momenti i djeshëm kur prokuroria vendosi të reduktonte dosjen në këtë akuzë, politika ka heshtur.

Ka heshtur zhurmuesi Lulzim Basha që akuzonte Taulant Ballën se ishte garanti i parave dhe se po pastrote para të pista. Ka heshtur edhe Taulant Balla që rrëmoi e gjeti një lidhje të Bashës me një nga të akuzuarit.

Këshilli i Ambasadorëve Shqiptarë ka shpërndarë sot një deklaratë përmes së cilës i bën thirrje qeverisë shqiptare që të konsiderojë me seriozitet situatën e re të krijuar nga marrëveshjet detare të Greqisë në funksion të mbylljes së kësaj çështjeje nga vendi ynë. Këshilli vlerëson se ka një mungesë transparence nga qeveria shqiptare, ndaj së cilës apelon për qasje krijuese dhe jo mekanike. 

Europa ka vendosur ta quajë Lukashenkon si dikë që vjedh zgjedhjet. Mediat perëndimore raportojnë se Ministria e Jashtme gjermane ka autorizuar një zëdhënës që të flasë për “të dhëna të caktuara për mashtrime në zgjedhjet presidenciale” dhe madje se “nuk janë respektuar as standardet minimale të votës”.

Presidentja e Komisionit Europian, Ursula von der Leyen ka folur për dhunën ndaj protestuesve duke cilësuar se “në Europë nuk ka vend për atë që dhunon protestuesit paqësorë”. 

Ish-shefi i Antikrimit Ekonomik në Policinë e Shtetit, Arjan Hoxha, e sheh shqetësuese situatën e  drogës në Shqipëri. Në një intervistë për TvT, Hoxha thotë se vendi është në një situatë alarmi të kuq, për shkak të kultivimit, por edhe të shndërrimit të tij në vend tranzit për drogërat e forta.

Teksa shumë vendime të organeve të përkohshme të vetingut nuk kanë dhënë notë kaluese për njerëzit e drejtësisë,  një pjesë e tyre i kanë ankimuar në Gjykatën e të Drejtave të Njeriut për shkak të paligjshmërisë së procesit të ndjekur nga Komisioni Pavarur i Kualifikimit dhe  Kolegji i Posaçëm i Apelimit. Konstitucionalistja, Aurela Anastasi thotë se disa vendime të gjyqtarëve të Vetingut, mund të rikthehen për rishqyrtim nga Strasburgu.

Sot presidenti i Republikës, Ilir Meta ka shpërndarë një mesazh me rastin e 29 vjetorit të ikjes së anijes “Vlora” e cila hapi siparin e eksodit të marsit 1991.

Në 8 gusht 1991 anija “Vlora”, me rreth 20 mijë shqiptarë në bord, nisi udhëtimin drejt lirisë duke u kthyer në simbolin e shpresës për një jetë të re dhe një të ardhme më të mirë.

Zbarkimi i tyre në brigjet e Italisë, dëshmoi para gjithë botës tragjedinë dhe dhimbjen e një populli të vuajtur për dekada nga dhuna, shtypja, mjerimi dhe izolimi.

U bënë muaj që bota mbarë jeton e detyruar në kushtet e pandemisë së provokuar nga CoVid-19, e cila përveç numrit të vdekjeve ka krijuar kushtet e një sifde të hapur ndaj të gjithë raportit të besimit ndaj institucioneve.

Ne po shohim përditësim protokollesh dhe vlerësimesh mbi vetë virusin. Do të duhet të mbahet parasysh se vetë sistemi shëndetësor i vendeve kryesor ndryshoi klasifikimin e sëmundshmërisë së virusit që nuk quhet më mirëfilli respirator. Ky është një dallim shumë i rëndësishëm që përcakton jetën e pacientit, mjekimin e tij dhe pasojat.

Lëvizja Vetëvendosje është subjekti i parë politik që krijon një televizion të vetin.

Në rrjetin social Facebook, të enjten u transmetua produkti i parë i televizionit të krijuar nga Lëvizja Vetëvendosje, “TVV”.

Por, mediumi televiziv i hapur për herë të parë nga një subjekt politik në Kosovë, do të transmetohet së shpejti edhe në “Youtube”, platformën tjetër online.

 “Nga sot kemi filluar me TVV. Këtë medium mund ta gjeni tash e tutje në Youtube”, ka konfirmuar përmes një postimi të shkruar në Facebook, Arianit Beqiri, asistenti i Albin Kurtit.