Blloku Ekonomi

Ulje në programin e shpenzimeve kapitale për periudhën afatmesme 2016-2018, në krahasim me parashikimet e janarit. Ky është dhe rishikimi që ka bërë Qeveria, shkruan“Monitor”. Kjo ulje në parashikime shihet të ketë ardhur nga dobësitë serioze që po shënon qeveria në realizimin e zërit të investimeve edhe pse ai po vjen në ulje. Kështu pritjet për zërin më të rëndësishëm të buxhetit që ndikon në rritjen ekonomike shpenzimet kapitale janë shkurtuar me 9% për vitin 2016 deri në 35% më pak në vitin 2018.

Pas City Park edhe qendra tregtare Casa Italia ka ndryshuar logon, duke u kthyer në Mega Outlet. “Monitor” raporton se aksioneri kryesor, “Erjol shpk” ka blerë edhe pjesën tjetër të aksioneve nga ortakët italianë. Kalimi definitiv ka ndodhur në vitin 2013, kurse së fundmi është bërë edhe ndryshimi i logos. “Të ardhurat nga vit në vit nisën të bien teksa, detyrimet e qëndres u rriten. Sipas të dhënave nga bilanci që kompania ka dorëzuar në QKR të ardhurat e kompanisë në vitin 2011 u ulën 39 për qind në krahasim me vitin 2010.

Marrëveshja e re mes qeverisë shqiptare dhe  dhe shoqërive “S2 Albania”,  sh.p.k., dhe  “Rapiscan  Systems”, INC do të nisë të zbatohet më 26 gusht.  Sipas marrëveshjes së re, tarifa e shërbimit të skanimit për deklaratat doganore, me vlerë nën ose të barabartë me 1 000 euro,  do  të  jetë  5  euro  për deklaratë  doganore ose vlera  përkatëse në  lekë, konvertuar sipas procedurave doganore.

Aksidenti i rëndë në zonën e “Don Boskos” ka nxjerrë edhe një problem si ai dëmshpërblimit për dëmet e shkaktuara. “Top-Channel” ka kërkuar mendimin e përfaqësuesve të kompanive për këtë çështje dhe rezulton se situata nuk është aq e thjeshtë.

Çfarë do të ndodhë me konçesionin e parkimeve në Vlorë, për të cilin u tha se është anulluar? Investigim.al trajton këtë çështje duke zbardhur kontratën e nënshkruar mes Bashkisë dhe kompanisë së vetme në konkurim. Në të parashikohen kushtet e kontratës, shkeljet, përfitimet, penalitetet dhe detyrimet e kompanisë fituese. Kjo kompani koncesionare krijoi bashkimin e përkohshëm të dy kompanive të regjistruara në Delaëere të SHBA dhe Rosh Pina të Izraelit dhe specifikisht “Tis Holdin  LLC” dhe “On Track Innovations  LTD”.

Serbia mund të jetë një zgjidhje e tregtarëve shqiptarë për t'iu shmangur embargos së afërt ruse ndaj fruta - perimeve. Këtë e njofton faqja "Agroweb" e cila ndjek çështjet e agrobiznesit shqiptar. "“Made in Serbia” për produktet shqiptare? Besojeni ose jo, por për të shkuar në Rusi rruga e frutave dhe e perimeve shqiptare kalon pikërisht përmes Serbisë. Kjo është mënyra që tregëtarët shqiptarë mendojnë si rrugëzgjidhje pas embargos ruse, që pritet të zgjerohet me 7 vende të reja, duke përfshirë edhe Shqipërinë.

Instituti i Sigurisë Ushqimore dhe Veterinare ka publikuar sot përgjigjet e analizave për miellin e bukës. ISUV ka marrë në shqyrtim 47 mostra dhe ka dalë me përgjigjen se ato kanë rezultuar negative. Analizat janë kryer në disa rrethe të Shqipërisë për praninë e “bacillus subtilis” i cili njihet në gjuhën popullore si shkaktar i “sëmundjes së Patates”. Mostrat kanë rezultuar negative por ato nuk japin panoramë për të gjitnë vendin. Ky bakter prodhon substanca toksike dhe e tjetërson bukën, duke shkaktuar erë, etj..

Pezullohen të gjitha lejet e ndërtimit në territorin e vendit. 61 bashkitë e reja duhet të angazhohen në plane të reja vendore nga e para dhe vetëm pasi këto plane të jenë dorëzuar, qeveria do lejojë vijimin normal të ndërtimit.

Banka e Shqipërisë ka shpallur për llogari të financave një tjetër ankand ku do të tentojë shitjen e 20 milionë eurove në obligacione fiks dy vjeçare, sepse nuk arritën të sigurojnë të gjithë shumën e nevojshme në ankandin e mëparshëm në bono në euro. “Monitor” raporton se ankandi do të zhvillohet në datë 18 gusht. Ky është ankandi i tretë i obligacioneve në euro dy vjeçare.

Ankesave për Velipojën, Sarandën, Ksamilin (se bregu i Rivierës është bërë prej vitesh i paprekshëm për vdekatarët e thjeshtë), sa u përket çmimeve të fryra që nuk i përgjigjen shërbimit të duhur ndaj pushuesve, u është shtuar dhe Shëngjini. Ora News ka intervistuar disa pushues dhe konstaton se çmimet në bregdetin e Shëngjinit kanë pësuar rritje të theksuar në këtë sezon turistik në hoteleri dhe produktet ushqimore. Pushuesit shprehen se çmimet këtë vit janë të kripura dhe më të larta se të gjitha vendet e rajonit, ndërsa shërbimet që ofrohen lënë për të dëshiruar.