Blloku Bota

"Siria do t'i përgjigjet agresionit turk, kudo në territorin e saj, me të gjitha mjetet që ka në dispozicion”-deklaroi Presidenti sirian  Bashar al-Asad, pas vendimit për të dërguar trupat qeveritare siriane në mbështetje të forcave kurde të shënjestruara nga operacionet ushtarake të Ankarasë.

Duke dënuar "agresionin" e Turqisë, Asad u zotua se Siria "do t'i përgjigjej Turqisë dhe do ta përballonte atë, në të gjitha format , në çdo zonë të territorit sirian dhe me të gjitha mjetet e mundshme ligjore".

Bashkimi Europian dhe qeveria britanike arritën marrëveshjen për Brexit siç njoftoi kryeministri britanik Boris Johnson.

"Kemi arritur një marrëveshje të drejtë dhe të ekuilibruar për Brexit”-tha Presidenti i Komisionit Evropian Jean-Claude Juncker menjëherë pas arritjes së marrëveshjes. “Është një marrëveshje që dëshmon për angazhimin tonë për të gjetur një zgjidhje. Unë rekomandoj që samiti i BE  ta ratifikojë këtë marrëveshje"-shtoi ai.

Një operacion policor në Veri të Kosovës nga forcat speciale kosovare ka dhënë shkas që nga Serbia të rizgjohen reagimet e njohura për ndëryrje në territorin e shteti fqinj.

Kësaj radhe mediat serbe citojnë një zyrtar të dorës së dytë dhe që pak lidhje ka me vendimmarrjen reale për kësi gjërash. Drejtori i Polisisë serbe, Vladimir Rebiç ka deklaruar se Beogradi është i përgatitur të ndërhyjë nëse ndodh një eksod i serbëve por mandej ka shtuar se është i bindur se komuniteti ndërkombëtar nuk do ta lejojë një gjë të tillë.

Sipërmarrësi i njohur italian, Carlo De Benedetti ka njoftuar përmes një interviste në gazetën “Corriere della Sera” se ai ka ndërmend të rigjallërojë grupin mediatik “Gedi” që zotëron ndër të tjera edhe gazetat “La Repubblica” dhe “La Stampa”. Ai ka sqaruar se investimi kryesor për gazetën “La Repubblica” do të përqendrohet te dixhitalizimi për të vijuar më tej me krijimin e një fondacioni.

Kurdët kanë arritur një marrëveshje me qeverinë siriane të Bashar al Assad për frenimin dhe kundërvënien e ofensivës turke në veti të Sirisë. Mediat raportojnë se kurdët do të dorëzojnë qytetin e Manbij dhe Kobanes në kontrollin e Damaskut zyrtar pas një marrëveshjeje që u ndërmjetësua nga Rusia. Media shtetërore siriane njoftonte dje se trupat ushtarake kanë nisur lëvizjen drejt veriut të vendit për të “përballur agresionin turk në territorin sirian”.

Presidenti turk, Reccep Tayyip Erdogan i ka lënë të gjithë me gisht në gojë me ofensivën e tij në Siri. Për sa i përket, Erdogan ka nxjerrë dy justifikime bazë: së pari krijimi i një hapësire dhe situate për kthimin e refugjatëve sirianë dhe së dyti, moslejimin e krijimit të një shteti terrorist në veri të Sirisë. 

Operacionet ushtarake në Siri vijojnë me një intensitet të paparë. Turqit thonë se kontrollojnë qytetin sirian të Ras Al Ain, por ushtria Siriane mohoi një gjë të tillë. Valët e njëpasnjëshme të zhvendosjes se njerëzve nuk kanë të ndalur me më shumë se 191,000 njerëz që raportohet të jenë larguar nga shtëpitë e tyre.

Të shtunën në mëngjes, Ministria turke e Mbrojtjes njoftoi se 415 rebelë kurdë ishin "neutralizuar" që prej fillimit të operacionit.

Qeveria rumune është rrëzuar dje pasi kryeministrja socialdemokrate Viorica Dăncilă humbi mocionin e besimit në Parlament.
238 deputetë votuan pro mocionit, që u vu në lëvizje një javë pas negociatave mes palëve gjatë të cilave disa anëtarë të shumicës u larguan drejt opozitës. Pushteti i kryeministres u trondit pasi aleatët e saj në koalicion dolën nga qeverisje na gusht të këtij viti. 

Presidenti Klaus Iohannis do të të duhet të zgjedhë një kryeministër të ri, ndërkohë që vetë Dăncilă është kandidate për zgjedhjet presidenciale të 10 nëntorit. 

NATO ka deklaruar sot përmes sekretarit të Përgjithshëm të saj, Jens Stoltenberg se ndërhyrja turke në Siri ka mbështetjen e Aleancës. Në ndryshim nga presidenti amerikan, Donald Trump, që deklaroi se SHBA tërhiqet nga Siria për t’ia lënë Turqisë përgjegjësinë e luftës, Stoltenberg ka bërë mbulimin duke e cilësuar operacionin turk, një veprim që zyrtarisht pranohet si legjitim.

Komiteti i Akademisë Suedeze ka vendosur t'i japë çmimin Nobel për Paqen për vitin 2019 kryeministrit të Etiopisë, Abiy Ahmed Ali. Sipas njoftimit Abbe është vlerësuar  për përpjekjet e tij për të arritur paqen dhe bashkëpunimin ndërkombëtar, dhe veçanërisht për iniciativën e tij për të zgjidhur mosmarrëveshjet kufitare me Eritrean fqinje

"Komisioni beson se përpjekjet e Abed Ahmedit meritojnë njohje dhe kanë nevojë për inkurajim. Shpresojmë që çmimi Nobel do të mbështesë Kryeministrin Abe në përpjekjen e tij të rëndësishme për paqen dhe pajtimin"-theksohet në njoftim.