SHBA tani njësoj si Shqipëria e Edona Bilalit dhe Elisa Spiropalit

Agjencia “Reuters” ka përcjellë live në rrjetet sociale një konferencë për shtyp të Zëdhënëses së Shtëpisë së Bardhë, Karoline Leavitt, lidhur me rrjedhjen në media të sekreteve të operacionit të SHBA ndaj rebelëve Houthi. Incidenti ilustron dashur apo padashur se në majën e piramidës së vendit me systemin ushtarak kryesor botë, mund të ndodhë që operacionet të diskutohen në shërbime mesazhesh si “Signal” dhe se aty pa dasur shtohen të tjerë. Përtej kësaj, përgjigja e Leavitt është edhe më sheqetësuese. Ajo ka përsëritur disa herë duke “iu drejtuar publikut amerikan” se:

Ju i besoni Sekretarit të Mbrojtjes që ka shërbyer në luftim, i ka shërbyer me nder vendit tonë, apo i besoni Jeffrey Goldberg që është një demokrat i anëtarësuar dhe një anti-Trump i lajmeve sensacionale? Ne po kthejmë fuqinë e Amerikës

Është e jashtëzakonshme të shohësh nivelin e përgigjes dhe argumentin se meqë ministri ka qenë në luftë, atij i lejohet çdo budallallëk apo pakujdesi. Apo meqë ai ka qenë në luftë, asnjë pyetje nuk ka kuptim.

Mirëpo Donald Trump është ndër ata njerëz që vinte në diskutim edhe historinë personale të McCain aq sa dikush e këshilloi që ta linte atë punë mënjanë. Nuk është më çështja të diskutohet politika e SHBA, por të shihet se gjithë synimi është mbrojtja e imazhit dhe rreshtimi në bllok i të gjithëve për të kapur humorin e një njeriu të vetëm që ka në dorë karrierat e të gjithëve.

Është kjo SHBA që i ka bërë leksione gjithë botës për demokracinë, standardet, kontrollin, balancimin, institucionet, të drejtat, llogaridhënien dhe vjen puna që sot ofron një shfaqje që ne në Shqipëri na kujton Edona Bilalin dhe Elisa Spiropalin. Për t’u shënuar se edhe agjencia “Reuters” ka bllokuar fushën e komenteve në “Facebook”, një tjetër gjest ky që flet për toksicitetin e madh që sundon në marrëdhëniet mes administratës Trump dhe mediave që po përshtaten tashmë me klimën e re.