Për Ukrainën mbetet një paqe armene. Erdogan - Orban, mirëpresin qasjen e Trump ndaj krizës

Fitorja e Donald Trump në SHBA ka rezonuar siç pritej në Europë. Presidenti turk Recep Tayyip Erdogan, ka deklaruar se nëse konflikti në Ukrainë do të shihej nga një perspektivë e paqes dhe e qasjeve të Trump, atëherë shumë shpejt lufta do të merrte fund.

Më shumë armë, më shumë bomba, apo më shumë kaos nuk do t’I japin fund kësaj lufte

citohet Erdogan.

Nga ana tjetër, kryeministri hungarez, Viktor Orban, ka deklaruar se Europa nuk mund ta financojë Ukrainën pa ndihmën amerikane, një sinjal i qartë ky se politika e ndalimit të konfliktit ka fituar një momentum të ri.

Dy politikanët në fjalë kanë përcjellë kështu mesazhe miratimi për qasjen e Trump, i cili ka nevojë të kuptohet dhe pranohet pa eksese në komunitetin ndërkombëtar.

Apeli në fjalë nënkupton se Ukraina ka vetëm dy rrugë: ose të pranojë ndarjen, ose të luftojë në metodën e vjetër të mobilizimit popullor.

Nëse kthehemi pas, në mars të vitit 2022, një muaj nga invazioni, Zelenskiy që dje nga samiti i Komunitetit Politik Europian deklaronte se çdo ide për ndarje është vetëvrasje për Europën, e pranoi armëpushimin e Stambollit, por u detyrua të vazhdonte luftën nën presionin anglo-amerikan. Në këto kushte, administrata Trump me gjasë përcakton fundin politik të tij dhe aktualizimin e një paqeje si ajo e Nagorno Karabakut.

Po kështu mund të kuptohet mirë pragmatizimi i Erdogan, që me mbështetjen e Trump kërkon patjetër një qasje të re të SHBA ndaj krizës në Lindjen e Mesme. Këto ditë në rrjetin “X” kanë qarkulluar lajme se 79% e hebrenjve të SHBA votuan Kamala Harris, por edhe një video e vjetër e Trump, kur ishte president, në të cilën ai shprehet me tone shumë pozitive për Mahmoud Abass, kreun e Fatahut të cilin e krahason me një baba.