Varosha, “Las Vegasi i Mesdheut” për 10 miliardë dollarë

Turqia mund ta kthejë qytetin e Varoshës në “Las Vegasin e Mesdheut”.

Gazeta turke “Sozcu” shkuan se lagjes fantazmë në Famagusta i duhen 10 miliardë dollarë për t’u rikthyer në jetë pas braktisjes 50-vjeçare.

Zona e braktisur në Qipron veriore ka komplekse të mëdha banimi të zbrazura, dyqane dhe hotele. Në total, zona ka 105 hotele, 3 000 dyqane, 99 vende argëtimi, 4 649 shtëpi verore, 21 banka dhe 24 teatro e kinema.

Gazeta turke shkruan se grekët qipriotë kanë refuzuar ofertat për ta kthyer Varoshën, në këmbim të heqjes së embargove ekonomike. Zona u hap për vizitorët në tetor 2020.

Një tjetër gazetë turke, Turkiye, raportoi pak ditë më parë për masat e reja për të kontrolluar shitjet e pronave për të huajt në Qipron e pushtuar, veçanërisht nga blerësit izraelitë. Sipas saj, autoritetet vendase kanë vendosur rregulla më të rrepta për të parandaluar pronësinë e huaj në shkallë të gjerë. Rregulloret e reja, të cilat hynë në fuqi kohët e fundit, i kufizojnë blerësit e huaj që të blejnë vetëm apartamente ose shtëpi.

Në fillim të viteve 1970, Varosha, e cila është vetëm një pjesë e  Famagustës, ishte destinacioni turistik numër një në Qipro. Interesi i madh për të bëri që zona të zgjerohej menjëherë me shumë ndërtesa të reja të larta dhe hotele. Gjatë lulëzimit të saj, Varosha ishte jo vetëm destinacioni numër një turistik në Qipro, por midis viteve 1970 dhe 1974, ajo ishte një nga destinacionet turistike më të njohura në botë dhe u kthye në destinacionin e preferuar të personazheve të famshëm si Elizabeth Taylor, Richard Burton, Raquel Welch dhe Brigitte Bardot.

Para vitit 1974, Varosha ishte zona moderne turistike e qytetit të Famagustës. Banorët e tij qipriotë grekë u larguan gjatë pushtimit turk të Qipros në vitin 1974, kur qyteti i Famagustës ra nën kontrollin turk, dhe që atëherë ai ka mbetur i braktisur. Në 1984, një rezolutë e Kombeve të Bashkuara bëri thirrje për dorëzimin e qytetit nën kontrollin e OKB-së dhe tha se vetëm banorët fillestarë, të cilët u detyruan të largoheshin, mund të rivendoseshin në qytet.