Duhet një Çuç në çdo qeveri

I bëj thirrje të gjithë shqiptarëve që nuk kanë biletë e s’janë në Tiranë mos tentojnë të vijnë atë ditë në Tiranë se qyteti do jetë në dispozicion të tifozerive, miqve dhe atyre që kanë një biletë.

I bëj thirrje të gjithë binzeseve që nuk kanë lidhje me finalen, jo baret e restorantet, e gjithë bizneset e shërbimet, por të tjerat si bankat apo zyrat e ndryshme private që si kemi bërë me institucionet publike apo shkollat ta bëjnë e ata ta shpallin ditë pushimi të mërkurën se do jetë e paralizuar sa i takon qarkullimit të mjeteve gjithë Tirana.

Ne kemi marrë masa që cdo tifoz mik t’i ketë dyert e hapura e gjithë kanalet e dedikuara në mënyrë që të aksesojnë Tiranën me formën sa më të lehtë e kollajtë.

Mos tentoni të vini në Tiranë të mërkurë, sepse Tirana do jetë e miqve nga Roterdami dhe Roma

Kjo është thirrja publike që ka bërë sot ministri i Brendshëm, Blendi Çuçi, i cili ka shpallur kështu paralizimin e kryeqytetit për një ndeshje futbolli. Nuk e dimë si do dukej Erion Veliaj nëse do bënte një thirrje të kësaj natyre, por na duhet të kënaqemi edhe me shfaqjen e Çuçit që thotë me lehtësinë më të madhe gjëra nga më absurdet.

Kryeqyteti kyçet kështu nën peshën e jashtëzakonshme të një ndeshjeje futbolli që shpallet si emergjencë kombëtare e ngjashme me kushtet e një lufte.

Nuk dihet nëse ka ndodhur më parë që të deklarohet mbyllja e një kryeqyteti për çështje të një ndeshjeje futbolli, që prevalon kështu mbi çdo nevojë apo liri për lëvizjen e qytetarëve. Duhet një Çuç për deklarata të këtilla të cilat padyshim nuk kanë ndonjë gjë autoritare për shkak të dozës së lartë të budallallëkut që përçojnë.