7 vjet luftë shkatërrimtare për Sirinë (Video)

Rrënoja, rreth gjysmë milioni të vdekur, mijëra të plagosur, jetë të shkatërruara dhe tokë e djegur. Shtatë vjet lufte janë shpenzuar në Siri, me gjendjen edhe sot të vazhdojë të jetë dramatike ...

Në verën e vitit 2015, Presidenti Bashar al Assad ishte në një situatë veçanërisht të vështirë. Ushtria e tij kishte shumë  fronte të hapura dhe ushtarët e tij ishin të lodhur dhe të gatshëm të hiqnin dorë nga armët ... Disfata e tij ishte para dyerve pasi forcat qeveritare po humbisnin vazhdimisht terren. Grupet e armatosura të xhihadistëve po kërcënonin edhe bastionet qeveritare. Në këtë situatë një gjeneral iranian shkoi në Moskë dhe i shpjegoi qeverisë se çfarë po ndodhte.

Pas kësaj, gjërat ngadalë filluan të ndryshonin në favor të Asadit. Në fund të verës së vitit 2015, forcat qeveritare kontrollonin më pak se 25% të territorit sirian. Moska ishte e shqetësuar se "fundi" i Bashar al-Asadit, aleatit të ngushtë të Kremlinit ishte afër ...

Në Asamblenë e Përgjithshme të OKB-së në shtator 2015, Vladimir Putin tha se përfshirja e Perëndimit në Lindjen e Mesme ishte "katastrofike". "Në vend të demokracisë dhe progresit, ne tani kemi dhunë, varfëri, katastrofa sociale dhe shkelje të të drejtave të njeriut," tha presidenti rus.

Në kohën kur fliste, aeroplanët e parë luftarakë rusë arritën në bazat ushtarake në bregun sirian ...
Për Putinin, ndërhyrja ushtarak në Siri do të tregonte gatishmërinë e Rusisë për të ruajtur aksesin e Moskës në Mesdhe. Në disa raste, megjithatë, organizatat amerikane dhe ato të të drejtave të njeriut akuzuan rusët se bombarduan edhe spitalet. 

Të zhvendosurit e brendshëm të valës së parë braktisën shtëpitë e tyre për shkak të sulmeve të rënda ajrore në Sirinë veriperëndimore dhe ngritën strehime të improvizuara përgjatë autostradës qendrore në provincën Idlib. Konfliktet kanë shtyrë më shumë se 212,000 njerëz të lënë shtëpitë e tyre. Sot, shumica e grupeve të armatosura në Siri kanë pësuar tashmë humbje të rënda, por ende nuk janë mundur plotësisht.

Ata kanë shumë vite përvojë në fushën e betejës. Asad kontrollon tani më shumë se gjysmën e Sirisë, por qytetet në kufirin me Turqinë mbeten një ëndërr e pakapshme, pavarësisht ndihmës nga katër vende. Më e rëndësishmja, megjithatë, është se shtatë vitet e fundit të luftës kanë shkaktuar një "trashëgimi helmuese", ekstremizmëm dhe një valë emigrimi që vazhdon të boshatisë Sirinë.