Marrëveshja mbi Paktin Detar duhet rinegocjuar nga e para

Këto ditë ka dalë lajmi se së shpejti do të rifillojnë negociatat shqiptaro-greke për trajtimin nga e para të çështjes së kufirit detar midis dy vendeve fqinje. Qeveria shqiptare, e cila i doli për zot marrëveshjes së parë, është ndjerë shumë ligsht në momentin që Gjykata Kushtetuese e shpalli marrëveshjen fillestare aq të qortuar e të denoncuar si një marrëveshje që binte në kundërshtim me kushtetutën dhe me Konventën e OKB-së për të Drejtën e Detit. Ndërsa disa zyrtarë grekë janë bërë nervozë pas nulifikimit të marrëveshjes në fjalë prej Gjykatës sonë kushtetuese, gjë që duket tek deklaratat e tyre, se “jemi në pritje që Shqipëria të njohë firmën që përfaqësuesi i vet ka hedhur në marrëveshje”, dhe se “i kemi dhënë kohë qeverisë shqiptare që të gjejë rrugët për ta ricikluar marrëveshjen dhe për ta vënë atë në zbatim”.

Qeveria shqiptare ka reaguar me drojë pas ndërhyrjes së Gjykatës Kushtetuese, gjë që nuk e kish dëshmuar deri në atë moment. Përkundrazi, kritikët e marrëveshjes që ajo po lidhte me palën greke etiketoheshin nga funksionarë të saj si sharlatanë, injorantë, matufë, etj, ndërsa ata vetë deklaronin (po citoj një citim të Ksenofon Krisafit në një shkrim të gjatë e të plotë mbi këtë çështje të publikuar në numrin e sotëm të Gazetës Shqiptare), se “Shqipëria nuk ka falur e nuk ka humbur asnjë milimetër katror të territorit të saj”, gjë që u përgënjeshtrua në mënyrë spektakolare nga Gjykata Kushtetuese.

Është e qartë se palët nuk mund të bëjnë sikur nuk ka ndodhur asgjë, e në këtë kuptim – shprehet prof. Ksenofon Krisafi – “procesi i rinegocjimit nuk mund të mendohet si diçka që mund të realizohet me arnime mbi tekstin e Marrëveshjes së 27 prillit 2009, e cila është tanimë inegzistente, nul dhe e paqenë, sepse është hedhur poshtë nga Gjykata Kushtetuese”.

E.G.