Giulio Tremonti shpërthen: Silvio, është koha të ikësh!

Ministri i Financave të Italisë, Giulio Tremonti, është ndoshta i vetmi njeri brenda maxhorancës, me të cilin Berlusconi matet mirë kur flet. Ka shumë që mendojnë se pa të, Berlusconi mund ta kish hedhur Italinë në greminën e krizës shumë më herët. Ka qenë Tremonti pra që ka mbajtur mirë të lidhur qesen e parave, dhe nuk ka lëshuar pe në asnjë rast përballë presioneve që i kanë ardhur nga të gjitha anët për rritjen e shpenzimeve.  As përballë presioneve të Berlusconi-t.

Ka ca kohë që flitet se marrëdhëniet e tyre kanë marrë një të krisur të fortë. Shkaku është i thjeshtë: Tremonti është i mendimit se Italia nuk mund ta përballojë më një kosto që i vjen prej leadershipit të Berlusconi-t. Njerëzit e këtij të fundit, sidomos gazetarët, e kanë sulmuar egërsisht, por faktet tregojnë se Tremonti, jo vetëm s’është tërhequr, por ka zënë ta shtojë dozën e kritikës ndaj boss-it. E famshmja Financial Times bën me dije, se në një moment privat gjatë summit-it G 20 ai i është drejtuar Berlusconi-t me fjalët: "Nëse ti Silvio nuk jep dorëheqjen deri të hënën, tregjet kanë për të reaguar në mënyrë të frikshme. Me të drejtë apo pa të drejtë, për tregjet e për Europën problemi i madh je ti”.

Do t’ia vërë veshin Berlusconi?