Revista Time provokon me kopertinën e vet; dhe sjell diskutime

Revista e famshme Time ka dalë në numrin e saj të fundit me një foto provokuese, ku tregohet një mamá e re që po ushqen të birin në një situatë jo fort tipike. Nëna e re është veshur me pantallona të ngushta, me një kanotiere të zezë, me njërin gji të zbuluar, dhe me vështrimin ‘e paturpshëm’ nga kamera. Ndërsa i biri, ka vënë gojën në gjirin e nënës, dhe vështrimin e mban gjithashtu nga kamera; por vështrimin e ka të hutuar (gruaja që ka pozuar, 26 vjeçarja Jamie Lynne Grumet, është vërtet me të birin në këtë foto). Titulli i kopertinës që ka lidhje me çfarë ka kapur aparati fotografik është: Are You Mom Enough? (Jeni mamá aq sa duhet?).

Gjetja ka shkaktuar reagime, dhe me sa duket, ky ka qenë dhe qëllimi i atyre që “e kanë shpikur”. “Kjo nuk është një mama tipike; fotoja nuk inkurajon gji-dhënien; gji-dhënia është komunikim midis nënës e fëmijës, e ky komunikim mungon në këtë shkrepje; fotoja është tepër e seksualizuar; etj, etj” – me këto fraza përmblidhen reagimet që në fakt kanë qenë të shumta. Por ka pasur dhe reagime që nuk kanë parë ndonjë dramë në këtë mes; përkundrazi. Dhe e para është Jamie Lynne Grumet d.v.

Secili mund ta ketë një opinion në këtë mes. Edhe ju tuajin.

Re.Pu.