Show presidencial ka futur në ethe tërë Shqipërinë

Të përditshmet hapen vazhdimisht me tituj ‘presidencialë’. Edicionet informative të televizioneve, gjithashtu. Ka muaj të tërë që e gjithë bota mediatike këndon avazin presidencial. Berisha, Rama, Meta, ambasadorët, Nano, Zaganjori, Topalli, etj, janë personazhet e ditës, të cilët shfaqen kudo, japin intervista, shkojnë nëpër studio televizive, ku flasin veç për Presidentin; dhe në këtë valle nuk ka mbetur njeri pa u përfshirë. Është një mënyrë e mirë për të fshehur problemet e mëdha të këtij vendi, për t’mos folur për këto të fundit.

Dje dhe sot kanë dalë dhe lajme mbi rënien e rritjes ekonomike të Shqipërisë nën 2%, mbi shtimin e kredive të këqija, mbi rritjen e borxhit publik, etj, por gazetat i kanë pasur në faqet e mesit, shpesh pa asnjë njoftim në faqet e para. Shqipëria është e tëra nën ethet e show-t presidencial. Pas politikës, media është e dyta që duhet kryqëzuar për këtë situatë absurde.

Post Scriptum: Këto ditë në Britaninë e Madhe është festuar 60 vjetori i mbretërimit të Elizabetës. Është hera e dytë që ndodh një festë e tillë në histori. Kush ka patur rast të hapë gazetat britanike pas datës 2 qershor, fjala vjen the Guardian, do të ketë vënë re me lehtësi, se kjo festë nuk ka eklipsuar lajmet e tjera. Përkundrazi, në plan të parë kanë qenë problemet e vendit, të kontinentit, apo të botës.

M.N.