A do t’i plotësonte Fatos Nano kushtet juridike për President të Republikës?

Teorikisht, përderisa Artan Hoxha ende nuk ka marrë të paktën 71 vota për t’u bërë President i Republikës, Fatos Nano e ka një mundësi fare të vogël për të garuar në raundin e 5-të të votimit për këtë post. Por a i plotëson ai kushtet juridike për të qenë President i Republikës?

Neni 86.2 i Kushtetutës së Republikës së Shqipërisë vë këtë kusht juridik për personin që kandidon për postin e presidentit : “President mund të zgjidhet vetëm shtetasi shqiptar që nga lindja, me qëndrim jo më pak se 10 vjetët e fundit në Shqipëri dhe që ka mbushur moshën 40 vjeç”.

Fatos Nano e ka vendlindjen dhe datlindjen e duhur, por qëndrimi i tij në Shqipëri 10 vjetët e fundit është i diskutueshëm. Dihet publikisht që 7 vjetët e fundit ai ka jetuar kryesisht në Vjenë të Austrisë (çfarë përfaqëson fjala “kryesisht” mund të verifikohet lehtë me dokumentacionin e hyrje- daljeve në Shqipëri dhe Austri, në qoftë se dikush i futet kësaj pune).

Gjëja që deri më sot nuk është testuar legjislativisht është termi “qëndrim”, sepse presidentët e derisotëm nuk kanë jetuar jashtë Shqipërisë para se të zgjidheshin. Në praktikën juridike të vendeve të ndryshme, një person konsiderohet se ka qëndruar në një vend për një periudhë të caktuar, në qoftë se ka qenë fizikisht atje më shumë se gjysmën e ditëve të asaj periudhe.

Do të ishte interesante sesi do t’i përgjigjeshin legjislatorët shqiptarë pyetjes se çfarë kanë patur parasysh me termin “qendrim” dhe, më tej, është interesante të dihet nëse ka qenë Fatos Nano më shumë se 1825 ditë në Shqipëri gjatë 10 vjetëve të fundit.

E.Zaloshnja