Rama: Zgjerimi i rrugës së Elbasanit, alibi për një klientelë famëkeqe të kryeministrit

Kryetari i selisë rozë, Edi Rama, deklaroi sot në një konferencë për shtyp se gjithçka që po ndodh në zgjerimin e rrugës së re të Elbasanit, është diçka që shkon në kundërshtim me një vendim të vitit 2004 të Këshillit të Rregullimit të Territorit dhe se po shërben për qëllime të errëta të një klientele të afërt me kryeministrin Berisha.

“Është dramatike ajo që po ndodh me Parkun Kombëtar. Kjo është shprehja e një vizioni barbarie që po kërcëon Tiranën dhe zhvillimin e qëndrueshëm të saj. Parku Kombëtar është i kufizuar me një vendim të Këshillit të Rregullimit të Territorit në vitin 2004 si një aset që nuk meriton vetëm vëmendjen dhe shërbimet e Bashkisë së Tiranës, por vëmendjen e të gjithë autoritetit të lartë shtetëror. Sot, me alibinë e zgjerimit të rrugës së Elbasanit, ajo çka po ndodh është hapja e territorit të Parkut për një klientelë famëkeqe në kryeqytet me dominancë me jashtëzakonisht të fortë në vetë ekonominë e vendit. Nuk ka asnjë dyshim e kontestim të arsyeshëm për zgjerimin të arsyeshëm të Rrugës së Elbasanit, por është e arsyeshme që të vendoset alarmi se zgjerimi i rrugës po përdoret si alibi për t’i hapur rrugë interesave të klientelës së kryeministrit dhe oborrit të tij,” theksoi ndër të tjera kryesocialisti Edi Rama.

Mapo