Ina Rama: Gjyqtarëve duhet t’u hiqet imuniteti

Në parlament ka patur sot një seancë dëgjimore lidhur me raportin e kriminalitetit në vend. Ina Rama është gjendur përballë deputetëve. Një nga ndërhyrjet më interesante ish ajo e deputetit Fino; kish të bënte me ata që dhunojnë në terren procesin zgjedhor: "Në vitin 2011 ju, zonja prokurore, keni regjistruar 25 procedime penale, nga të cilat 14 të pandehur. Asnjë prej tyre nuk po dënohet. Dua të di reagimin tuaj dhe të institucionit që ju drejtoni për mosdënimin e asnjë të pandehuri që ka cënuar zgjedhjet e lira dhe që deformon zgjedhjet". Por këtu zonja Rama u limitua të thotë se “janë ngritur akuzat, dhe pritet verdikti i gjyqtarëve”. Gjyqtarëve? Po, gjyqtarëve, për të cilët Ina Rama është e mendimit se duhet të jenë pa imunitet. Për ta u përdor termi korporatë, dhe në këtë pikë Majko gjeti rast të bëjë një përkufizim disi të shpenguar:  "Sistemi korporativ është një organizim i strukturuar njerëzish, të cilët veprojnë mbi ligjin".

Re.Pu.