Prifti: Ka filluar lobingu për mocion mosbesimi ndaj qeverisë në Kuvend

Periudha para zgjedhjes së Presidentit të Republikës por edhe afrimi PS-LSI duket se do të shoqërohet me lëvizje të forta në Kuvend ku nuk përjashtohet edhe ndonjë mocion mosbesimi ndaj kabinetit Berisha. Sinjalet e para publike për këtë të fundit i dha deputeti Dritan Prifti, gjatë emisionit “5Pyetje nga Babaramo” tek News 24. Sipas tij, tashmë në Kuvend kanë filluar lëvizjet për organizimin e një mocioni mosbesimi ndaj qeverisë Berisha duke theksuar se një ofertë e tillë i është paraqitur edhe atij. “Plani është që të organizohet një mocion mosbesimi ndaj qeverisë në Kuvend. Ka filluar lobingu. Kanë ardhur edhe tek unë për këtë”.

I pyetur në lidhje me zgjedhjen e Presidentit, Prifti theksoi rëndësinë që ka për vendin zgjedhja e një presidenti konsensual, por nuk përjashtoi mundësinë që të votonte edhe për kandidaturën e Jozefina Topallit nëse rrethanat do ta kërkonin këtë.  “Nëse do të kem përballë një figurë hajduti dhe tjetri  do të ishte Topalli, sigurisht që do të votoja Topallin”, - tha ai.

Krahas kësaj, ai parashikoi edhe qëndrimin e Metës për zgjedhjet e 2013-ës, gjatë të cilave pritet që LSI të kalojë majtas sipas Priftit. “Unë e njoh Metën dhe mendoj se lëvizjet e tij janë reale. Sa më shumë të afrohen zgjedhjet e 2013, ai do një aleancë të majtë se kështu u dalin votat se me Berishën i përgjysmohen votat. Nuk besoj se Meta do jetë në një pol me zotin Topi. Mendoj se nuk do të futen në një koalicion laraman, pa një identitet të qartë”.

S.E.