Një fatwa në adresë të Shahin Naxhafit, rapper-it gjermano-iranian

Shahin Naxhafi është një rapper me origjinë iraniane, që jeton si mërgimtar në Këln të Gjermanisë. Ai ka jetuar deri më sot si çdo rapper, dhe me siguri s’ia ka marrë mendja se do vinte një ditë që të jetonte i rrethuar nga nje eskortë policësh. E mbrojnë nga çfarë? Një ajatollah i Iranit ka nxjerrë një fatwa në adresë të tij, dmth një dekret a verdikt fetar, dhe atë fatwa e kanë pasuar shumë kërcënime me vdekje. Është caktuar dhe një ‘honorar’ për kokën e tij. Kush e vret, shpërblehet me 100 mijë dollarë amerikanë. Shkaku është një këngë e tij kundër regjimit politik në Iran, më saktë fakti që në këtë këngë ai ka futur (dhe vënë) në lojë Imamin e dhjetë, Ali al-Haxhi al-Naxhi-n, që ka jetuar më shumë se një mijë vjetë më parë. Ai i ka drejtuar një lutje këtij imami, që të kthehet në Iranin e këtyre ditëve, dhe t’i tregojë vendin regjimit dhe atyre që janë në komandë atje. Ai, si çdo rapper, bën edhe gallatë e lëshon edhe qesëndisje; e bën këtë dhe me Imamin e dhjetë. Madje, ai shkon dhe më tutje: në Youtube ka nxjerrë një imazh shoqërues për këngën, ku kubesë së një xhamie i jep formën e gjoksit të femrës, dhe thithkën e gjoksit e vë mu në majë të kubesë.

Kaq është dashur pra që të të lëshohet mbi të një fatwa, që me sa duket do ta shoqërojë gjithë jetën. Tok me policët që i janë vënë në mbrojtje.

Re.Pu.