E. Zaloshnja i përgjigjet Sinan Hibros

Në komentin rreth artikullit tim “Një debat i munguar për taksat”, Sinan Hibro ngre çështjen e rritjes së taksave për automjetet në përjestim me vjetërsinë e tyre. Kjo taksë përbën një shembull të taksave regresive, të cilat, ndryshe nga ato progresive, taksojnë më shumë të varfërit se sa të pasurit. Një i pasur e ka mundësinë të blejë një automjet të ri, i cili, sipas paketës së re fiskale të qeverisë shqiptare, nuk do të taksohet fare. Ndërsa z. Hibro ka një automjet të vitit 1990 dhe tani do t’i duhet të paguajë një taksë shumë më të lartë se pasanikët që shëtisin me automjete të rinj. Në shtetin e Virxhinias, ku unë kam jetuar në SHBA, taksa e automjetit është progressive, jo regresive – sa më e lartë vlera e automjetit, aq më e lartë taksa mbi të. Çështja e pastërisë së gazrave që lëshojnë automjet e vjetra zgjidhet me inspektimin vjetor – n.q.s. nuk e plotëson standardin, automjeti nuk lejohet të qarkullojë.