Brukseli na fshikullon; ndërsa Nishani fillon të flasë si President

Pasoja e parë e zgjedhjes së Presidentit ashtu si e zgjodhi Berisha erdhi më shpejt se sa pritej. Dhe më brutale, gjithashtu. Erdhi nga Brukseli. Petër Stanos, zëdhënësi i Komisionerit për Zgjerimin, Stefan Fule, që nuk ka lënë ngjarje të Tiranës pa komentuar, është ngutur të japë një koment dhe për ditën e djeshme. Më saktë, komenti është për shkak të ditës së djeshme: “Mund t’ju them se në këtë moment është e vështirë të shohësh ndonjë shenjë apo moment pozitiv që do ta çonte Shqipërinë, liderët e saj politikë dhe popullin në fazën tjetër të procesit për anëtarësim”.

Berisha e ka ditur që do të merrte këtë opinion nga Brukseli. Këtë gjë e ka ditur dhe Presidenti i ri, Bujar Nishani, e cili e ka përuruar mandatin e tij presidencial me një deklaratë. Është një deklaratë e qetë, e shtruar, një nga ato deklarata që ai i ka dhënë vazhdimisht, ku bie në sy një si sintaksë e çuditshme dhe e mërzitshme kozmopolite; fjala vjen: “adresoj konsideratat e mia për të gjithë kandidatët që u përfshinë në garë”.

E.G.