Rol politik, jo përfaqësim diplomatik

Askush nuk është mbi ligjin. ASKUSH-madje me gërmë të madhe. Na e siguron këtë ambasadorja amerikane në Tiranë, e cila ka zbuluar se ka një luftë personale me Sali Berishën dhe Ilir Metën. Meqë Meta e quajti spurdhjak kreun e SPAK, Arben Kraja për një hetim penal të nisur ndaj ish-presidentit, zonja u hodh në sulm për t’u shpallur mburojë e SPAK-ut nga sulmet e të fuqishmëve dhe të pasurve siç thotë ajo.

Kjo sjellje nuk i përket një vendi që është në NATO dhe është ulur në Këshillin e Sigurimit të OKB-së

na thotë zonja në fjalë.

Do kalojë koha dhe ky person këtu mundet të shkruajë edhe kujtime e të tallet  në to me shqiptarët. E mandej ato kujtime do merren e do rimerren si burim historik nga një shoqëri që nuk diti ndonjëherë të respektojë veten. Njësoj si me kalimtarët apo diplomatët e dikurshëm edhe tani historia më e besueshme jona kalon nga persona si kjo ambasadorja Kim.

E cila kur na kujton NATO-n dhe Këshillin e Sigurimit me siguri që harron se ka qenë e dërguar e një presidenti që tallte bythën edhe me njërën edhe me tjetrën. Ajo sjellje e Donald Trump cilit vend i përket, këtë mund të na e thotë zonja, meqenëse ne si vend i vogël e kemi të detyrueshme të kuptojmë?

Zonja Kim ndoshta nuk është në gjendje të perceptojë shndërrimin që ka pësuar qëkur ka ardhur në këtë vend, forcën tjetërsuese të kulturës së kënetës, nuk arrin dot të shohë se çfarë përfaqëson kur flet dhe për mënyrën si flet dhe ndoshta e sheh SHBA si imunitetin e vet. Sepse këto sulme vetëm një ambasadori nuk i takojnë dhe kjo pjesëmarrje vetëm në një krah e shndërron përfaqësimin diplomatik në rol politik përtej edhe fasadës së një demokracie.