Kreshnik Spahiu pyet ambasadorin Lu: Do t’i njohë SHBA kandidatët e inkriminuar që fituan bashkitë?

Kreshnik Spahiu gjen momentin për të bërë protagonistin. Kreu i Aleancës Kuqezi i ka dërguar një letër publike ambasadorit amerikan Donald Lu, ku përmes një serie pyetjesh i kërkon ambasadorit që të mos njohë fituesit e bashkive ku kandidonin persona me rekorde kriminale.

“Thirrjet tuaja për të mos votuar elementët mafiozë dhe “Mercedesët e Zinj” ishin një apel miqësor dhe diplomatik i një miku të vërtetë të shqiptarëve dhe jo i qeveritarëve. Ndërkohë që zgjedhjet përfunduan dhe emrat e kandidatëve fitues u publikuan, një sërë pikëpyetjesh u ngritën sërish për të ardhmen e Shqipërisë”, thotë Spahiu duke shtuar:

“Miliona sy janë drejtuar drejt jush për të parë dhe dëgjuar nëse:

– Kriminelët u votuan apo u refuzuan me vota nga shqiptarët?

– A do legjitimohet fitorja edhe nëse atyre do u krijoj imunitet funksioni publik i kryetarit të bashkisë?

– A do i njohë Uashingtoni ata si partnerë?

– A do njihen këto zgjedhje të fituara nga “mercedesët e zinj” si proces zgjedhor me standarde apo jo?

– A do bëhen publikë emrat e kryetarëve që fituan, por që më parë kanë pas rekorde kriminale apo do lihen anonimë emrat e tyre?”

a.k