Festa që dogji Jahjagën

Presidentja e vendit, Atifete Jahjaga, me fjalimin e saj në dymbëdhjetë vjetorin e themelimit të PDK-së, nuk është dalluar nëse është presidente e të gjithë qytetarëve të Kosovës, apo anëtare e Partisë Demokratike të Kosovës (PDK). Gjatë fjalimit të saj para anëtarëve të PDK-së, Jahjaga ka lavdëruar partinë e kryeministrit Hashim Thaçi më shumë sesa vetë lideri i saj.

“Përfaqësuesja e unitetit të popullit”, të hënën e ka harruar këtë mision duke folur sikurse në Kosovë të ekzistonte vetëm Partia Demokratike e Kosovës, të cilës ia ka atribuuar të gjitha meritat për organizimin e luftës dhe bërjen e saj, krijimin i institucioneve, pavarësimin e vendit e deri te integrimi në mekanizmat ndërkombëtarë.

Ky fjalim i presidentes ka prekur “në palcë” partitë e tjera në vend, anëtarët e të cilave, me ironi, shtrojnë pyetjen nëse presidentja ka lexuar fjalimin e saj, apo i është ngatërruar me atë të kryetarit të PDK-së, Hashim Thaçi.

Zëdhënësi i Lidhjes Demokratike të Kosovës (LDK), Fidan Jupolli, thotë se presidenten Jahjaga “e kanë marrë mësysh” në momentin që është gjendur afër anëtarëve të PDK-së, dhe si rrjedhojë e ka “huq qëllimin”, duke folur jo si kryetare e vendit por si zëdhënëse e kësaj partie.

Marrë nga Zëri