Ish Presidenti Mosiu: Kjo maxhorancë përdor mënyra të pështira për të fituar zgjedhjet

Alfred Moisiu e ka lënë mënjanë gjuhën e kujdesshme e të matur të ish Presidentit, dhe ka mbajtur qëndrime të qarta e të forta lidhur me procesin zgjedhor, me maxhorancën e me KQZ-në. “Po nuk u rregullua ashtu siç duhet kjo gjendje [ligji dhe procesi zgjedhor], atëherë me të drejtë mund të shtrohet pyetja: A ia vlen të marrësh pjesë në një votim, ku rezultati është i paravendosur në mënyra nga më të pështirat? Eshtë shumë i rëndësishëm riformatimi i KQZ-së. Eshtë vënë në dukje se ky institucion i rëndësishëm zgjedhor, duhet të jetë tërësisht i pavarur dhe jo i komanduar me telefon apo nga interesat partiake. Edhe ky problem u ngrit nga ne që përpara zgjedhjeve të vitit 2011. Për fat të keq u anashkalua, jo vetëm nga përfaqësues të politikës shqiptare, por edhe nga ata të institucioneve dhe përfaqësive ndërkombëtare”, tha Moisiu.

Pak më përpara e në të njëjtin veprimtari të organizuar nga Forumi Civil 2010, ky i fundit ka bërë qortime dhe për OSBE-në, sidomos për përfaqësuesit e saj në Tiranë. Por ambasadori Wolfarth u shfajësua me arsyetimin, se “nuk janë të huajt ata që drejtojnë, por qytetarët e këtij vendi; ODHIR-i nuk imponon zgjidhje, por jep vetëm këshilla dhe Parlamenti vendos; është edhe puna e shoqërisë civile që të ushtrojë presion mbi Parlamentin që reforma të mbyllet në kohë”.

Re.Pu.