Publicitet! Rikthehemi pas pak...

E mbani mend kur Aleksander Vuçiç i dha leje Edi Ramës të thoshte nga Beogradi se Kosova është e pavarur? Dhe që të shëtiste në këmbë në Preshevë? Disa e mbajnë mend këtë gagarel të shijonte veten duke shitur se ka ndonjë lojë të vetën lumëmadhi. 
Ka kaluar shumë kohë. Tentoi ky edhe të bëhej pjesë e ndarjes së Kosovës, miqësimit serbo-shqiptar e nuk qullosi gjë. Sepse një hileqar e ka litarin të shkurtër. 

Sot z. Rama ishte në Athinë. Në një stadium ku foli para një eksklave socialistësh, një pjesë e të cilëve, nga ata që jetojnë në Athinë, nesër do hiqen si arvanitasit e rinj. Është vizita e dytë e z. Rama në të cilën tentoi Beogradin, por realizoi një karikaturë. Sepse nuk e kishte lejen. Zoti Rama i ngjan një dashnoreje tradicionale shqiptare: deklaron se të do shumë, vdes për ty, ama njëherë të mos i plotësosh një dëshirë të lëshohet me histeri. Mandej rikthehet e të thotë: të shkuara, të harruara.

Pas vizitës në Zapion si artist, z. Rama përfundoi në një stadium ku mbajti leksionin e vet të zakonshëm. Në fund kujtoi ca vargje të Naimit për Mitsotakis të cilin e quan mik. Por miku nuk e priti. Sepse në vendet e kësaj bote shtëpia nuk është e mikut. Sidomos kur miku është shqiptar që ditën e dytë pasi ka bujtur nis e mendon se është në mall të vet. 

Shfaqjen z. Rama megjithatë e dha. Atë që di ta bëjë, e bëri. I ngazëlleu ata që ishin aty, e ngriti ca lart flamurin, ngriti edhe zërin. Dhe kaq.

Do ikë tani për t’u kthyer në Shqipëri ku do dërdëllisë 1 javë me analistët e vet se si u shkrua historia. Pastaj, fillon vera e çdo gjë harrohet. Sepse kjo është edhe politika dhe historia që ai gjeneron: dukje, hile, marifet, pastaj lëpirje. Ikën 11 vjet e asgjë nuk ka në bilanc veç publicitet. Megjithatë i sugjerojmë që ta ushtrojë zhanrin e karikaturës, se ndoshta qëllon.

s.zaimi