A është kjo liri?

“Shoqata Martijn, themeluar në 1982-shin, synon të krijojë një platformë për diskutimin mbi pedofilinë. Shoqata lufton të bëjë të pranueshme në shoqëri raportet i rritur-fëmijë. Në raportet midis fëmijëve dhe të rriturve të perceptuara si të kënaqshme, një intimitet fizik nuk duhet të jetë një problem. Lidhur me këtë intimitet fizik, shoqata Martijn propozon katër rregulla: dakortësi reciproke, informim i prindërve të fëmijës, liri për fëmijën për tu tërhequr nga raporti në çdo moment, harmoni me zhvillimin e fëmijës. Shoqata është pro së vërtetës objektive dhe shkencërisht të verifikueshme dhe kundër terrorit politik dhe diskriminimit.”

Ç’janë këto rreshta të ndyra? – mund të pyesi çdokush, sidomos lexuesit që janë edhe prindër. Në Hollandë, prej më shumë se 30 vitesh, egziston një shoqatë pedofilësh e cila propagandon “pranimin nga shoqëria të intimitetit fizik midis fëmijëve dhe të rriturve”. Në 2006-tën presidenti i shoqatës Martijn, tentoi të krijonte një parti politike (e ashtuquajtur “Partia e dashurisë vllazërore, e lirisë dhe e ndryshimit”), e cila kërkonte uljen nga 16 në 12 vjeç të moshës për raporte seksuale të ligjshme dhe liberalizimin e drogave të lehta. Për fat të mirë, partia nuk mblodhi firma të mjaftueshme për kandidimin në zgjedhje. Disa vite më pas, në 2011, administratori financiar i shoqatës, një farë Ad Van Der Berg, u dënua me 3 vite heqje lirie për mbajtje të paligjshme të materialeve pedo-pornografike. Në një deklaratë tw pahijshme prej njw të sëmuri mendor Van Der Berg-u u justifikua duke thënë që videot dhe fotot me përmbajtje seksuale me të mitur, përdoreshin “për qëllime shkencore”. Sikur të mos mjaftonte me kaq, mediat lokale zbuluan midis antarëve të shoqatës edhe një prift (ngelur anonim dhe i identifikuar si “At Van B.”), i cili shprehej me zë dhe figurë se “shoqëria mendon se raportet pedofile janë të rrezikshme, por unë nuk jam dakort”.

Më në fund, në 27 qershor të vitit të shkuar, gjykata e shkallës së parë së Assen-it, urdhëroi shkrirjen e menjëhershme të shoqatës, errësimin e faqes së internetit dhe të çfarëdolloj propagande. Gjykatësit u shprehën se pedofilia “përfaqëson një sjellje të tmerrshme, jo normale dhe jo të pranueshme. Shoqata Martijn cënon të drejtat e vogëlushëve, sepse fëmijët nuk janë në gjëndje të mbrohen nga sjelljet erotike të të rriturve.” Shoqata dekretohej e jashtëligjshme sepse “ofron një rrjet mbështetës virtual dhe social për kriminelët që ngacmojnë fëmijët”. Edhe përse e vonuar, drejtësia u shpreh dhe gjithçka duhej të kishte marrë fund. Por vendimi u apelua nga vetë kryetari i shoqatës dhe gjykata e Apelit e Leeuwarden rrëzoi në mënyrë të pabesueshme shkallën e parë.

Apeli konfirmoi se “liberalizimi i pedofilisë është në kundërshti serioze me disa principe të sistemit penal hollandez”, se “pedofilia është një sjellje çnjerëzore”, por se “propaganda e pedoflisë nuk mund të ndalohet”. Në emër të lirisë së fjalës, gjykata argumentoi se “shoqëria hollandeze është rezistente mjaftueshëm sa të përballojë deklaratat e papëlqyeshme dhe sjelljet e papranueshme të reklamuara nga grupimi në fjalë.” Pra mesazhi që përcjell shoqata e pedofilëve është kundër rendit publik, por e drejta e fjalës së lirë garanton pedofilët që të vazhdojnë të mbrojnë publikisht tezat e tyre sepse shoqëria hollandeze është mjaft e fortë për të ndarë të mirën nga e keqja.

Pedofilia është krim, por një organizatë që propagandon dhe mbron pedofilinë është e ligjshme meqënse liria e së shprehurit na qënka dominuese. Të gjithë mund të gjykojnë vetë këtë paradoks dhe ta zgjidhin sipas ndjeshmërisë së tyre kontrastin midis lirisë së fjalës dhe mbrojtjes së fëmijëve. Personalisht mendoj se fjala është e fuqishme dhe se shpesh herë ajo është premisa për të justifikuar veprimin. Nësë një argument duket i diskutueshëm, atëhere edhe akti që rrjedhon perceptohet më pak i rëndë në sytë e atij që e kryen. Liria nuk mund të jetë absolute, as ajo e fjalës. Justifikimi i akteve seksuale me të mitur të pambrojtur jo vetëm nuk është argument, jo vetëm nuk mund të lejohet por përkundrazi duhet të dënohet si një atentat ndaj rendit shoqëror. Mendoni pak çaste për fëmijën tuaj, dhe më pas jepni një përgjigje: a është kjo liri?

"Gazeta Dita"