Si na shohin të huajt: bufi i stemës së Bylisit të Ballshit

WSC (When Saturday comes), një revistë sportive që tregon se anglezët, përveç futbollit, kanë të zhvilluar edhe fantazinë mbi të, merret edhe me dekodimin e stemave të klubeve të futbollit. Këtë javë ka pikasur emblemën e ekipit shqiptar të futbollit ‘KF Bylis’, e cila ka në qendër një buf. “Nuk e di si i bëjnë gjërat në Shqipëri, por nuk i bëjnë njëlloj si ne këtu. Të vendosësh një buf me probleme përqendrimi në qendër të stemës së një klubi futbolli, duket si tërheqje vëmendjeje në drejtimin e gabuar”. Kështu e nis dekriptimin e simbolikës së Bylisit, Cameron Carter i WSC-së. Nuk është e qartë, vazhdon ai, se si dizajnuesit kanë arrritur te ky simbol, por disa hamendësime mund të jepen. “Së pari duhet të ketë qenë një konkurs për dizajnon e stemës së klubit që është fituar nga një 5 vjecar, koncepti i të cilit për natyrën si një lloj kampi pushimi veror për kafshë me probleme fizike i shkon përkundër sensit të poezisë së Tennyson-it “Natyra, e kuqe në dhëmbë dhe kthetra”.

Së dyti, vazhdon sarkazma e WSC-së, ekziston një traditë e llojit naivo-primitiv në botën e heraldikës shqiptare dhe kjo e Bylisit, për shqiptarët, ndoshta është standardi. “Ndoshta logoja e televizionit shtetëror është një dordolec buzagaz me një tollumbace në dorë. Dhe së fundi, ndoshta një buf i rënë me këmbë përpjetë shërbeu si shtysë për themelimin e klubit Bylis. Sidoqoftë, asosacioni historik i bufit me mençurinë mund të debatohet”. Megjithëse ekziston një radhë e gjatë kafshësh të egra dhe frikësuese – të gjalla apo mitike – me të cilat mund të sajohej simboli i ekipit, Bylisi i Ballshit përzgjodhi një buf që s’di nga shkon, përfundon Cameron Carter në WSC.

L.A.