Sarkozy: Bëmë gabim që pranuam Greqinë në zonën Euro

Grekët e thjeshtë, e në përgjithësi të gjithë ata që s’janë pjesë e establishmentit, nuk është se janë shumë të kënaqur me atë që u arrit në Bruksel; e shohin marrëveshjen e arritur si premtim për një një mizerje të zgjatur. Por kryeministri George Papandreou s’ish parë kurrë gjatë muajve të fundit kaq entuziast e optimist: "Sot ne kemi një mundësi t’i mbyllim njëherë e mirë hesapet me të shkuarën. Është një fillim i ri .... është një sukses për ne”, tha ai vetëm pak minuta pasi ishin mbyllur ca negociata që kishin zgjatur dhjetë orë pa ndërprerje.

Të tjerët jashtë Greqisë nuk janë kaq të lumtur sa Papandreou. Presidenti francez Sarkozy u shfaq mbrëmë në një intervistë për televizionin France 2, në prime time, për të bindur bashkëpatriotët e vet se një natë më parë ishte marrë vendimi më i mirë i mundshëm. “Neve na duhej ta merrnim atë vendim. Sikur Greqinë ta lëmë të bjerë në default, do të kemi pastaj një efekt domino, që do t’na marrë me vete të gjithëve”, tha ai në thelb, por pa harruar të nënvizojë se “ka qenë një gabim i madh pranimi i Greqisë në zonën Euro; grekët s’ishin gati; ata hynë me shifra të trukuara”.

M.N.