Presidenti: Dje humbën qytetarët, dhe fituan njerëzit e lidhur me pushtetin

Ligji mbi importimin e plehrave është miratuar dje nga parlamenti shqiptar, me votën e deputetëve vuvë të maxhorancës (vetëm Gamend Oketa doli kundër) dhe nën dirigjimin e një kryeministri të eksituar si rrallë ndonjë herë tjetër. Por për atë ligj do flitet gjatë; ndërkohë duhet shpresuar që të jetë sa më jetëshkurtër e me impakt minimal për aq kohë sa do jetë në fuqi.

Siç pritej, një ditë më pas nuk kanë munguar reagimet. Në fillim ka qenë Presidenti i Republikës, i cili nuk e ka fshehur dëshpërimin. Mes rreshtave të asaj që tha (por edhe tek vetë rreshtat) lexohej një alarm i pazakontë presidencial: “Mund të them se ndjej keqardhje për kalimin e ligjit të importit të mbetjeve. Tashmë importi është një çështje e qytetarëve dhe jo e politikanëve. Interesi i qytetarëve duhej vënë para atyre që përfitojnë nga ky ligj”. Siç shihet nga fraza e fundit, Presidenti është i sigurtë që në themel të miratimit të këtij ligji janë interesa të ndyrë okultë (për të ndoshta s’janë okultë).

Pas tij erdhi një prononcim i Edi Ramës: “Sot Shqipëria është si një shtëpi që ka hapur derën për të mbledhur plehrat e komshinjve. Nesër do jetë shumë vonë!” Jozefina Topalli ka rast të kërkojë një tradhëti tjetër tek kjo përkitje në kohë mes qëndrimit të Presidentit e atij të leader-it të opozitës.

M.N.